Rajya Sabha MP K.Vanlalvena chuan Mizoram chhung, Bairabi leh Sihhmuiah te tuialhthei dah khawlna, oil depot siam turin sorkar laipui hotute a ngen.
K.Vanlalvena chuan nimin khan Union Petroleum & Natural Gas Secretary Pankaj Jain chu a office-ah a hmu a, Mizoramah tuialhthei dah khawlna siam a tul chungchang a sawipui a, ngenna a thlen.
Rajya Sabha MP chuan Mizoram chu tlangram a nih avang leh fur ruahtui tlak tamna ram a nih avangin fur laiin tuialhtheiah harsatna a thleng thin tih sawiin, “Inkalpawhna kawngpui leh rel kawng a that loh apiangin Mizorama tuialhthei phurtu lirtheiten harsatna an tawk thin,” a ti.
Hengte avang hian tha laia petrol leh diesel chhelkhawlna tur Mizoramah din thuai a tul thu union secretary hnenah hian a thlen a, oil depot dinna atan hian rel station awmna, Bairabi leh kum 2025-a rel station ni mai tawh tur, Sihhmui chu hmun remchang leh tha ber nia a hriat thu a thlen bawk.