Barcelona in an khingpui turte ang thovin hnehna chang turin penalty shootout an mamawh a. Real Betis lakah vannei zawkah tangin hnehna an chang.
Ningani zanah Supercopa de España semi-final chu Riyadh-ah khelh a ni a. Real Betis nen 2-2 in extra-time zawhah an inhnehtawk. Barcelona goal veng Marc-Andre ter Stegen chuan Juanmi leh William Carvalho te penalty pet a dansak ve ve a. 4-2 in an chak ta zawk.
Pathianni zan final-ah El Clasico khelh a ni dawn a. Valencia hnehtu Real Madrid nen champion an inchuh dawn.
Hun pangngai a inkhelah Barcelona tan kum 30 mi goalkeeper Ter Stegen a kheltha hle a. Penalty an pet hma atang tawhin a team a chhanhim fo.
Barcelona in Pedri hmanga goal an khung pawm a nih loh hnuah Betis an hlauhawm a. Luiz Henrique leh Rodri te goal khung tur German goal veng in a dang.
Robert Lewandowski chuan first half-ah Ousmane Dembele siamsak atangin goal hmahruai a khung a. Hei hi second half-ah Nabil Fekir chuan Betis tan a sut.
Barca in an goal hnihna an khung niin lang hman mahse Lewandowski goal khung offside avanga pawm a ni lo leh.
Extra-time ah Ansu Fati hmangin hma hruai leh mahse Loren Moron chuan sut leh a ni.
Ter Stegen chuan inkhel zawhah, “A bikin second half-ah ball an thunun hneh em avangin kan tan inkhelh a harsa a, an midfield a tha hle a, hnehna chang tur hian kan beih nasat a ngai hle.” a ti.