Aizawl: Central Young Chakma Association President atana thlan thar Dr. Jyoti Bikash Chakma chuan hnam chi hrang hrangte nena cheng khawm an nih avangin tute pawh inngeih tak leh lungrual taka thawhpui tum zel turin YCA member-te a chah.
Ni hnih awh Central Young Chakma Association General Conference vawi 43-na, Kamalanagar-a neih mek chu nimin khan chhunzawm leh niin he huna thusawitu, Dr. Jyoti Bikash Chakma chuan YCA din chhan a nih angin mi dangte tanpuitu leh khawtlang siam thatu ni zel turin YCA member-te a chah.
Ningani zan khan Returning Officer Hriday Chakma kaihhruaina hnuaiah kum 2023-2026 chhunga Central YCA hruaitu tur thlan a ni a. President-ah Dr. Jyoti Bikash Chakma, Senior Vice President atan Milon Chakma, Vice President-ah Mandira Chakma, General Secretary-ah BH. Sadhan Bikash Chakma leh Treasurer atan Shanti Bikash Chakma te an thlang a ni.
Nizan khan CYCA General Conference vawi 43-na chu a tiak a ni.
Young Chakma Association hi October 25, 1978 khan din a ni.