Union minister hlui leh India ram chhunga vantlang hruaitu hriat hlawh ber pawl, Sharad Yadav chu Ningani khan a thi.
Kum 75 mi, Yadac-ahi rei tak bawksawp tawhin Ningani khan Delhi-a a chenna inah a tlu sual zui a. Rang takin Gurugram-a Fortis Memorial Research Institute-ah kalpui nghal a ni a, an thlenpui lai hian engmah hre tawh lovin emergency ward-ah dah luh nghal a ni.
“Endinaah pawh marphu leh blood pressure a nei tawh lo va. CPR tihsak a ni a, theihtawp chhuak ni mah se zan dar 10.19-ah a kal ta a ni,” tiin damdawi in chuan thu an chhuah.
Zirlai pawl hruaitu thin, Yadav-a hi politics khel zuiin Congress lamtangte do pawl a ni a, a hnuah JP movement-ah nasa takin a inhmang zui.
Politics-a hun a hman chhung tam zawk hi eptu lama tang niin na taka sorkar nawrtu a ni a. A hun tawp lam, Bihar-a kum 2015 assembly election zawhah khan Congress leh politics-a a elpui reng, Lalu Prasad Yadav nen Grand Alliance an din.
Yadav-a hi Atal Bihari Vajpayee-a sorkar leh kum 1989-a VP Singh-a sorkarah khan union minister a ni.
Rajya Sabha member atan vawi thum leh Lok Sabha member atan vawi sarih thlan tlin a ni a. Bihar-a rorel mek, Janata Dal United dintute zinga mi niin tuna chief minister ni lai, Nitish Kumar-a’n Grand Alliance kalsana BJP a zawm hnuah a bâng a ni.
Kum 2018 khan ama pualin party, Loktantrik Janata Dal a din a, kum hnih hnuah Lalu Yadav-a kaihhruai, Rashtriya Janata Dal nen inchhun finin ‘tangruala eptu chak tak’ nih an tum thu a sawi.