California laili, US-a in pakhata inkahna thlengah mi paruk an thi a, an zingah hian nausen thla ruk mi leh a nu, kum 17 mi pawh an tel.
Goshen hmunah hian Thawhtanni zing dar 3:30 (India-a tlai dar 5:00) pelh hnu deuhvah police koh niin kawtlaiah ruang pahnih leh in chhungah pali lo awm an hmu a ni.
Police chuan thah takte chhungkua hi mi sual pawl (gang)-ah inhnamhnawihna nei niin an hria a, miin an thah phah ta niin an ngai bawk.
Kar hmasa maiah khan an in hi ruihhlo kaihhnawihah dap a lo ni tawh tih Tulare County Sheriff Mike Boudreaux chuan Thawhtannia thuthar lakhawmtute a kawmnaah a sawi.
A sawi dan chuan police an thlen hlim hian an zinga pakhat a lo la dam a, damdawi ina lak nghal ni mah se a thi zui ta a ni.
A titu hi pahnih niin an hria a, an chhui zui mek.“Thil eng eng emaw chu kan hriat belh tawh a; mahse, tuna thutlukna siam leh sawi mai nan a la remchang rih lo,” a ti.
Khaw tereuh tê-a inkahna thlengah hian mi thenkhat chu himin an chhuak niin Bordreaux chuan a sawi a. Goshen hi Los Angeles hmar lam, darkar thum leh a chanve vel tlana awm a ni.