Mizoram State Museum-in nikum chhung khan tlawhtu 14,194 a nei a, museum hi thalaiten an ngaihlu chho hlea an ngaih thu thawktuten an sawi.
The Zozam Times zawhna chhangin museum enkawltute chuan nikum chhung khan state museum chu tlawhtu mi 14,194 an awm a, chung zinga mi 50-te chu India ram state dang atanga Mizorama zinte an ni a, India ram pawn lam mi pathum an awm bawk niin an sawi a. Museum tlawh man atangin Rs 93,030 an hmuh thu an sawi.
Museum enkawltute chuan nikum kumtir lam khan COVID19 a la hluar deuh avangin museum tlawhtu an tlem hle a, January thlaah phei chuan tlawhtu mi 15 chauh an neih thu leh May thla atanga an pun chhoh tan thu an sawi.
“Museum tlawhtu tam zawk hi zirlai naupang leh thalai rual an ni a, museum ngaihhlutna thalai zingah a awm chho zel niin kan ngai,” an ti.
Mizoram State Museum tlawhtute hnen atang hian tlawh man puitlingah Rs 20, naupangah Rs 10, sikul naupang uniform ha tan zaa 50 consession leh foreigner tan Rs 50 lak thin a ni a, hetihlai hian Museum Week emaw, ni bikah emaw chuan a thlawna tlawh theiha hawn thin a ni.
Museum-ah hian en tur thil chi hrang (object) 800 chuang a awm a, hengte hi mi thahnemngaite pek leh museum thuneituten an leikhawm te an ni a, en tur object thar dah luh belhna tur hmun an nei tawh mang lo niin thawktute chuan an sawi bawk.