Central YMA hruaituten nimin khan Bangladesh Zohnahthlak raltlante awm Parva III leh Vathuampui an tlawh a, tanpuina an hlan a, ramri vengtu Border Security Force hotute kawm bawkin raltlante harsatna siamsak tawh lo turin an ngen.
Parva III-ah hian Vantlang inkhawm neih a ni a, Central YMA president R. Lalngheta chuan thu sawiin sahimna zawnga Mizoram lutte thlamuang taka awm turin a chah a, YMA, sorkar leh Mizo mipuiten an tih theih chinah theihtawpa tanpui an inhuam thu a sawi.
Central YMA hian mipuite thawhkhawm atangin Parva III-a raltlante tan Rs 45,000 , Vathuampuiah Rs 30,000, Chamdur Project-ah Rs 40,000, Mautlang-ah Rs 30,000 , Hmawngbu-ah Rs 30,000 leh Tuichawng Group YMA hnenah Rs 20,000 an hlan bakah chhungkaw mamawh chi hrang hrang an hlan a, Pastor Sawmkhupa ralna a fanu hnenah Rs 5000 an hlan bawk.
Central YMA hruaitute chuan Parva III-ah hian BSF hotute an kawm nghal a, raltlan dinhmunte leh an harsatnate an sawipui a, manganga sahimna zawnga India ram rawn pan te harsatna lo siamsak lo tur leh lo tanpui zawk turin an ngen.
Raltlan tlawha Mizoram chhim lama zin Central YMA hruaitute hian Thawhlehni zan khan Chawngte-ah Chawngte Group YMA leh branch hrang hrang hruaitute bakah Central Young Chakma Association (CYLA) hruaitute pawh an kawm bawk a. CYMA President R. Lalngheta chuan CYLA hruaitute chu Zohnahthlak raltlante an lo puihna kawngah theihtawpa tang ve zel tur leh an tana harsatna siam lo tur zawnga che lo turin a ngen a ni.