Royal Enfield lirthei zinga a to ber ni turin Super Meteor 650 chu India ramah tlangzarh fel a ni ta a, Rs Nuai 3.48 – 3.78 man inkar tur a ni a, chi hnih Standard leh Tourer a awm dawn a ni.
Royal Enfield Super Meteor 650 hi rei tak atanga thawm lo nei tawh, India ramin a chhuah hun nghakhlel taka a lo thlir reng a ni a. Tunah hian lei theih turin an tlangzarh fel ta a ni. Super Meteor 650 hi Cruiser huangchhunga mi a ni a, a khawl hi 650cc lirthei dang lo chhuak tawh Continental GT leh Interceptor te hman ang tho a hmang dawn a, hetihrual hian a power pekchhuah danah te, gear lamah te lirthei huang dang deuha mi a nih avangin company lam chuan an her danglam hret a ni.
Tarlan tawh angin Royal Enfield Super Meteor 650 hian 648cc, air & oil-cooled, parallel-twin engine a hmang a. He khawl hian power lamah chuan 7,250rpm-ah 47bhp a pechhuak thei a, 5,650rpm-ah 52Nm torque a pechhuak thei bawk a ni. Royal Enfield lamin an tarlan danin Super Meteor 650 hian 2500rpm lekah a peak torque zaa 80 a pechhuak thei a. Hemi awmzia chu lirthei tha hrui chakna ngah tak, a khalhtuin accelerator a herh chhoh tan tirh lam, 2500rpm bawr lekah a thahrui chakna zaa 80 a pechhuak hman tawh tihna a ni a. A khalhtu tan chuan duhthusam a ni dawn a ni.
Transmission lamah chuan 6 speed constant mesh gearbox a nei a. He bike lenzawng hi dung 2260mm, a vang 890mm leh a san zawng 1155mm a ni a, ground clearance hi 135mm niin a wheelbase hi 1500mm a ni a. A seat san zawng hi 740mm a ni bawk a ni.
Solo Tourer variant hi rawng chi 5 – Astral Blue, Astral Black, Astral Green, Interstellar Green leh Interstellar Grey te a awm a. Grand Tourer variant hi rawng chi hnih – Celestial Blue leh Celestial Red a awm bawk a ni. He Royal Enfield cruiser 650cc bike hian a hmalamah 19-inch leh a hnunglamah 16-inch ke te a hmang a, a hnung leh hmaa a tyre hman hi a indawt danin 100/90 leh 150/80 tyre te a ni. Brake lamah chuan a hmalamah 320mm leh a hnunglamah 300mm disc brake te a hmang a. Dual-channel ABS (anti-lock braking system) chu eng variant-ah pawh standard fitment angin dah vek a ni.
Royal Enfield Super Meteor 650 hian suspension lamah a hmalamah Showa 43mm USD fork suspension a hmang a, hei hi Royal Enfield lirtheia hmang hmasa ber a ni a, Super Meteor hian full LED headlamp a nei bawk a ni. Royal Enfield bike zinga rit ber a ni dawn bawk a, a rih zawng hi kg 241 a ni. He cruiser bike thar hi Royal Enfield bike zinga Tripper navigation pod, standard fitment anga bike variant tina an dah vek vawikhatna a ni bawk a.
Solo Tourer theme Royal Enfield Super Meteor 650 atan hian hmanraw vuah belh tur hrang hrang bar-end mirror, bar-end finisher, front & rear LED indicator, solo finisher kit, compact engine guard, deluxe rider foot peg leh silver finish sump guard te duhthlan tur company chuan a nei vek bawk a ni.
Grand Tourer theme hi Celestial variant-ah awmin kentel hrang hrang – OE-fitted deluxe touring seat, pillion backrest, touring flyscreen leh a dangte a nei a. Hei bakah hian accessories hrang hrang a nei tel bawk a, heng zingah hian from touring handlebar, touring mirror, deluxe rider footpeg, LED fog light, airfly evo engine guard, black sump guard leh front & rear LED indicators te a awm bawk a ni.