Aizawl: Nimina Annual Status of Education Report (ASER) 2022 tihchhuah taka tar lan a nih danin thingtlangah ram puma kum ruk atanga 14 inkar sikul kai zat chawhrual aiin Mizoram dinhmun a tha zawk.
Piramal Group leh Pratham Education Foundation Chairman Ajay Piramal chuan nimin khan New Delhi-ah ASER Report vawi 17-na hi tlangzarhin India- rama primary education dinhmun tar lanna leh thingtlang miten lehkha an zir dan zirchianna lian ber a ni.
Covid-19 leng avanga sikul inkharkhip hnua naupangte sikul an luh leh hmasak bera an dinhmun tar lanna a nih avangin tun tum report hi a hlu bik a, district 616 leh thingtlang khaw 19,060 tuamin, chhungkaw 3,74,544 an tlawh a, kum thum atanga kum 16 inkar naupang 6,99,597 dinhmun an zawt a ni.
Mizoram bikah district pariat, khaw 228 leh chhungkaw 4,859 an tlawh a, India ram puma naupang kum 6-14, sikul kai zat chawhrualin 2018-ah za zela 97.2, 2022-ah za zelah 98.4 a nih laiin Mizoramah 2018-ah za zelah 99.6 a ni a, 2022-ah tlahniam hret mah se za zelah 99.3 niin ram pum dinhmun aiin a sang zawk a ni.
Mizoramah 2006 atanga 2014 inkar chhungin naupang kum ruk atanga 14 sorkar sikula kal zat zawi muangin a tlahniam a. 2014-ah zaa 59.3 niin heta tang hian an pung chho leh a, 2018 khan zaa 72.4 a ni a, a sang hman viau tihah tlahniam lehin 2022-ah zaa 64.7 an awm a ni.
2018 khan Mizoramah hmeichhe naupang kum 11-14 sikul kai lo, zaa 0.2 a nih laiin 2022-ah tha lo zawngin a pung a, zaa 0.7-ah chhovin 2018 khan kum 15 leh 16 inkar sikula inziak lut lo zaa 3.7 an ni a, 2022-ah zaa 5.3-in a pung bawk.
Mizoramah nikum khan naupang kum thum, anganwadi centre-a inziak lut zaa 93.3 an ni a, India ram pum huap chawhrual aiin a sang zawk a ni.