Congress Thalai chuan tun hnaia sorkar laipuiin mipuite hnena ration buhfai sem dan a tihdanglam chungchangah nimin khan Food Civil Supplies & Consumer Affiars Directorate tlawhin, a thlawna buhfai sem bak Mizoram sorkarin buhfai kg 3 chhunzawm an phut.
MPYCC President Lalmalsawma Nghaka chuan, sorkar laipuiin National Food Security Act 2013 a hman tan atangin ration card pawl hmang Priority House Hold (PHH) te tan kg 5 Rs 3-in a tumsak thin a. Mizoram sorkarin khamkhawplo ven nan kg 3 PHH te tan AAY rate-in a pe tel thin bawk a. Tun hnaia sorkar laipuiin NFSA hnuaiah PMGKAY hmangin PHH (card pawl) te tan mi pakhatah kg 5, leh AAY (card eng) te tan card khatah kg 35 a thlawnin buhfai sem tawh tura a puang chu lawmawm viau mah se, Mizoram sorkarin PHH te tan mi pakhatah kg 5 bakah AAY rate-a kg 3 a pek thin a titawp tur chu mi rethei leh dinhmun tha lo zawkin an tuar dawn niin a sawi.
Dr Lalmalsawma Nghaka chuan, Mizoram sorkarin chhawmdawl leh ngaihven hlawh ngai berte tan kg 3 AAY subsidized rate a an lak chhunzawm theih nana ruahmanna a siam lo anih chuan an en liam mai mai dawn lo tih sawiin, a tul angin miharsa zawk te leh chhawmdawl ngaite tan an ding zel dawn tih sawiin, “Mizoram sorkarin sum a enkawl thiam loh em avanga Mizoram mipui miharsa zawk leh chhawmdawl ngaiten harsatna tawk thei dinhmuna an ding mek hi MPYCC chuan pawi a tiin, lungchhiat thlak takzet a ni,” a ti.