Rilrulam thiam doctor te chuan internet kaihhnawih thila thûk taka inrawlh leh khawih loa awm thei lo te hian, ‘Facebook kaihhnawih rilruhahna’ an nei ngei, tih an finfiah thei tawh.
Rah tha lo tam
Mihring Billion 2.27 chuang awmna Facebook-ah hian thian tha leh chhungkua anga hmai-chhana inhmuhna boruak a tihtlem hret hret avang hian mimal leh chhungkuaah pawh rahtha lo a chhuah mek niin, Edinburgh Napier University-a mithiamte chuan an sawi.
Hetih lai hian, thian ni tura va ngen (request)-na lo hnawl sak te hian mahnia inthiam lohna leh insitna bakah, rilru nawmlohna a thlen thuai thin a, Facebook hmangtu sawm zela pakhatte hian chi-aina leh buairukna lian tak an nei deuh vek tih a biak sen loh leh kawm sen lo thian an neih mek laiin, thenkhatte’n thian tih-tham an nei lova, thian nei ngah deuhte thikna leh awhna an lo nei ve mek. Chu chuan an nitin nunah pawh harsata neuh neuh a thlen, tih a ni bawk.
Napier University-a thawk, he zirchianna bultumtu ber, Katy Charles chuan, “Contacts/friendlist nei ngah leh, helai hmuna an hun tam zawk hmangtute hi hmang ‘regu’ vak lem lo te aiin rilruhahna leh tawt ut utna an nei duh zawk a, neih theihna ‘chance’ pawh a sâng zawk,” a ti.
Facebook mai ni lo, social media platform thenkhat- entirnan: Whatsapp, Snapchat leh thil dang buaipuitute zingah pawh rilruhahna leh kim lo riaua inhria an pung zel.
A lova an awm theih tawh lo leh a tel lova awm nuam lo ni hiala hriatna a nasat avangin mahnia inawm tlei an pung zel a, midang mamawh lohna leh midangte nena inkawm ho dial dialna ang chi a tlem tial tial a, mal tlat nun- a hnua khawharna a thlen.