- Centenary C. Lalzahawma
Engkim tána hun ruat a awm ang hian, hringnunah lei mîte tán hun ruat a awm thìn. Mihringte nunna leh thihna inkár chu pên khat leka hla a ni a; nimahsela, Síamtu’n chu pên khat lek chhúng chuan hun chi tinréng mai min zawhtírin min pal tlangtír thìn.
“Thil hluite chu a ral ta a; ngai teh u, a lo thar ta,” tia Bible-a kan hmuh ang khán, hnah hluite chu tìl zovin hnah tharin a rawn thlák a; nimahsela, a kung erawh a ngai reng thìn. Nunhlui a lìam a, nun tharin a rawn thlák a; nimahsela, kan mihring taksa erawh a danglam chuang lo. Hruaitu hluite chu hruaitu tharin an rawn thlák a; nimahsela, an páwl hming erawh a ngai reng thìn. Khawvêl thil zawng zawng a inthlák danglam reng a, Síamtu erawh a ngai reng a, a danglam vè ngái lo. Síamtu rópùizia leh hringfate nun nêpzia hi hringnun hlimthlá hmu thiam tán chuan hmuh hmaih chî rúal a ni lo!
Mi tinte hi ka lo pìan chhuahna a inang lo va, thenkhat chu mi hausa chhúngkua atanga lo piangin, thenkhat erawh mi rethei tak chhúngkua atangin. Mi rethei tak chhúngkua atanga piang a, nu pum chhúng ata sual sâa píang bawk tán chuan Job-a anga làwm thu sawi reng a harsa hle ngèi ang. Mi thenkhat nu leh pate kawng sial sâa awlsam taka nun kawng an zawh láiin, thenkhatte erawh a kawng an sial chawp a lo ngái a. Bul tanna a inan loh miau avàngin kawng engkimah kan thlen chin a inang lo fo. Chu chu hringnun kàlphung a ni miau si a! Mahsé, thlen chin atanga hmasâwn zêl tùra Síamtu sìam kan nih avàngin beiseina nèn hma lam kan pan a tûl thìn.
Mi tin mai hian kan sulhnu leh nunhlui ngáiin ní kan hman ral a; mahsé, hma lam hun atán kan inbuatsaih lâwk thìn. Chu chu khuanu’n hringmi léng, dam chhúng khawsak ngaihtuah reng renga ni tin hun hmang tùrte tána a dùan a ni. Kan dinhmun azirin hringfate hi khawvêl pakhata cheng sìin kan khawvêl hi lei vàn a danglam tluk zetin a danglam a, a inthlau hle. He khawvêl hi mi hausate khawvêl a ni a, sum leh páiin ró a rèl miau avàngin dikna chungah meuh pawh róréltu a ni. ‘Sum ngah hi hlimna ber a ni lo’ mîte’n ti thìn mah sé, sum ngah apiang an hlim thìn si a nih hi! Chu chu hringnun khuarèl a ni miau si a!
Chul tùra dùan hringfate hringnun kalkawngah hian — nu pum chhúnga kan awm lái hunte, nausên nih hunte, naupang nih hunte, tleirawl leh rawl thar nih hunte, puitling nia nula tlangvâl nih hunte, nu leh pa nia pitar putar nih hunte a awm thìn. Chûng hun zawng zawngah chuan thihnain thlah a zár reng a, ni tinin múal kan liam thìn. Thihna hi râpthlák hle mah sé, hringfate thatna tùra Síamtu remruat a ni. Thihna hi awm lo sé, kum upa tawh mi tam tak, mahnia engmah ti thei tawh si lo, éi lo va awm thei bawk si lo enkawlin mi zawng zawng kan buai ang a. Èi leh bârah kawngah leh thil dang tam takah harsatna kan tâwk ngèi ang. Thihna hi hringfate tána Síamtu malsàwmna rópui tak a ni.
Mihringte hian vànglái hun bîk kan nei theuhva; nimahsela, chu hun chu chapòna tláng chhîpa Síamtu fiahna harsa ber kan hma chhawn hun a ni. Chu kawng zawhtute tam zâwk chuan fiahna an pal tlang zo lo fo. Chu kawng zawh thleng theitu chu mi rópui tak an ni a, fiahna pal tlang thei ngat phei chu an rópui lehzual. Fiahna pal tlang zo lo mi tam takte hi an demawm loh. Síamtu’n mî zawng zawng hriata min chàwimàwi hian, ‘mahni theihna leh thìamna avànga chu dinhmuna ding thei chu kan ni’ tia rilru chapòna neih hi thil harsa a ni lo reng a ni. Eng anga hmél thà, pìan nalh, hausa, lar leh rópùi pawh ni ila, chapó thei kan awm lo. Nu pum chhúng ata saruaka píang leh kutruaka kan zalhna tùr thlàn thim pan leh mai tùr kan ni tih hi hriat reng tùr a ni. Hringnun kawng kan zawh tan dàn leh kan zawh tàwp dàn hi mumang lama kan thil hmuh thín nèn a danglamna a awm meuh lo a ni.
Hringnun khawvêl, hmàn lái mîte tána khawvêl hlui tawh tak kha, naute píang hlim tán chuan khawvêl thar a ni. Kan nun kawng zawh tàwp hun tùr hre lovin mi tam takin nun kawng zawh tanin mi thenkhatin kan hun tàwp lam kan pan a, thi mai tùra inngái lah chûng zíngah chuan pakhat mah an awm si lo. Chuvàngin, kan dam chhúng níte chhìar dàn tùr kan thìam theih nán kan ‘HRINGNUN KAWNG’ hruaitu atán hruaitu ‘ARSI (ISUA)’ hi thlang ila. Zan thim hnuaiah pawh kawng dik kan zawh thei ngèi ang.