Inter Milan in an hmelma AC Milan chu Saudi Arabia-ah an sawp a. Supercoppa Italiana-ah 3-0 a hnehna changin champion trophy an hawn.
King Fahd International Stadium-ah Italian football season a Coppa Italia champion leh Serie A champion te khelh thin Supercoppa hi nghah a ni a. Inter in first half-ah goal hnih khungin second half-ah an khung belh a. Harsatna em em nei lovin hnehna an chang.
Inter in minute 10-naah goal an khung nghal a. Federico Dimarco chuan Nicolo Barella ball cross a thai lut.
Milan in Rafael Leao hmangin an si phurh an sut teuh. Goal an chhuah hnu minute ruk lehah Portugal forward goal khung tur hi Inter goalkeeper Andre Onana chuan a dang hman hlauh.
Minute 21-naah Inter in an goal hnihna an khung a, striker Edin Dzeko chuan veilam atang ball dawngin dinglam kilah a pet lut mawi.
Goal hnih an chhuah hnuah Milan an harh a, inkhel thununtu zawkah tangin an insiamtha. Mahse Inter tlarhnung an su tlang thei lova, chance mumal an nei tam lo.
Minute 77-naah Lautaro Martinez chuan an goal thumna mawi takin a khung a. A ke veilam pawn lam a ball petin a kual lut mawi hle.
Milan in huntawp dawnah Ante Rebic hmanga crossbar an tihper chu goal an khung teuh ber a ni.
Inter Milan hian Italy a cup final-ah Milan an hneh hmasak ber a ni a. Kum 1977 khan Coppa Italia-ah tlawm tawhin kum 2011 khan Italian Super Cup-ah tho hian an lo tlawm tawh.
Inter head coach Simone Inzaghi chuan kum khat leh a chanve Inter a enkawl chhunga a trophy pathumna a lak hnuah, “A tir atangin a tawp thlengin kan inthlahdah miah lo. Rilru kan insawrbing a, theihna zawng zawng nen kan khel tluan parh. He trophy lak hi player ten an phu.” tiin a sawi.