Kan ram khawchhak lamah sumdawnna dik lo, kuhva smugling avangin buaina a inmun chho nasa hle a. Hemi nghawng hian beisei loh takin sorkar hnathawk officer lian transfer thlengin a nghawng a. A district headquartes mipui a nghawng a. Kawngzawh leh India ram ni pawimawh Republic day boycott te hial a lo thleng ta hi a pawi takzet a. Boruak a tha lo chho zel dawn emaw tih laiin pa chanchangin Central YMA an inrawlh ta a. Tunah chuan boruak a pangngai chho leh ta rih a, a lawmawm hle.
YMA inrawlh avanga boruak lo dai chho hian entir pawimawh tak a neih chu, kan ramah hian mipuite leh sorkar hian kan YMA hi kan la ngaipawimawh tawk a. An thu leh hla hi kan zawm chak hle a ni tih hi a ni. YMA chu palai lo se chuan a khaw mipui tang lutuk hian tih loh loh tur an ti palh anga, tul lova tawrhna nasa zawk a thlen thei a. Sorkar pawhin he palaina hi a lawm hle tih a lang.
Mi tam takin YMA hi han sel thin mahse a tawpah chuan an ni nge nge tih a ni leh thin.
Hetiang taka pawl pawimawh anih avang hian a hotute hian an dinhmun hria in kan ram tluchhe mek tungding leh tur hian anni lo chu an awm lo a ni tih hi pawmin ke han pen zut zut mai se a va lawmawm dawn em. Kan ram thanmawhbawk corruption te hi YMA hian han luhchilh sela, Tender lova hna inpekna dik lote pawh hi han hma in, dik lohna zawng zawng hi han ngaimawh tak tak se chuan he ram tereuhte hian kar lovah ram awhawm kan thleng thei a ni. YMA hian thil tha a duh a, mipui pawhin kan duh. YMA atanga tih takzeta hma lak a nih chuan party induhsakna dik lo pawh hi kar lovah a bo ngei ang a. Kan ram tichhetu party inbeihna tha lo pawh hi a bo duak turah a ngaih theih a ni. YMA vul zel se kan ram tan.