Aizawl Zoological Park-ah sakei (tiger) nupa tuak khat dah belh tum a ni.
Aizawl Sahuan (Aizawl Zoological Park)-a dah tum sakei nupa tuak khatte hi kum ngaa upa ve ve niin, Nandankanan Zoological Park, Bhubaneswar, Odisha atanga lak tum a ni.
February 6, 2023 khian Aizawl Sahuan thawktuten sakei la turin Nandankanan Zoological Park an pan dawn a. Sakei lakna tur zoo-ah hian training an neih phawt hnuah lak chhuah chauh tura tih a nih avangin, Aizawl Sahuan thlen pui hun tur tak erawh sawi theih a la ni lo.
Sakei nupa hi Aizawl Sahuana savawm pa pakhat, zawng hmeltha pair khat bakah hauhuk nupa nena inthleng tura tih a ni a. Hetih lai hian, hauhuk nupa hi Central Zoo Authority (CZA) lamin an la rem tih loh avangin tunah hian Nandankanan Zoological Park thuneituten CZA-ah an dil tha leh mek.
Aizawl Sahuana dah tur sakei nupa hi tunah hian a dahna hmun tur hi buaipui mek niin siam zawh tep a ni a. A hmaa sakei lo awm sa pakhat nen erawh hmun khata dah an ni dawn lo thung.
Hetih lai hian April 1, 2022 atanga December 31, 2022, thla kua chhungin Aizawl Sahuan tlawhtu hi mi 43,901 awmin tlawhtute atanga sum hmuh chhuah zawng zawng belhkhawm chu Rs 7,53,700 a ni.