Aizawl : PC party office chu thiaha a thar sak a nih dawn avangin zirtawpni khan PC party office hlui thlahna inkhawm buatsaih a ni a. PC party office thiah tur thlahna inkhawmah hian PC party hruaitu hlui, party danga awm ta te pawh thahnem tak an tel.
Zirtawpnia PC party office hlui thlahna inkhawmah hian PC party President Vanlalruata’n an sawmna ngaipawimawha an party office hlui thlahna inkhawma tel te lawmthu a hrilh a. PC party kaltlanga Minister, MLA leh hruaitu lo ni tawh thin ten PC party leh ram tana sul an lo sut tawhnate an ngaihhlut thu leh hmabak la awm te pawh PC party-in theihtawp chhuaha ram tân an chhunzawm zel tur thu a sawi.
PC party Treasurer, Building committee chairman ni bawk HK. Liansawta pawhin PC party office chu hruaitu hmasate kuthnu a nih avanga an ngaihlut thu sawiin, thiah pawh an ui thu a sawi a. A dinhmun enin a thar sak ngei tul an tih si avangin thiah a ni dawn ta tih a sawi a. Office thar tur chu Mizopa chhiara chhawng ruk tur a nih thu leh a hnuai lam chhawng hnih chu motor dahna (garage) tur a nih thu leh a laihawl chhawng thum chu Office tura ruahman a nih thu te, a chhawng chung berah hall awm tura duan a nih thu leh a chung zawlah restaurant awm tura ruahman a nih thu a sawi.
PC party office thar tur ‘Brig. T. Sailo Rûn’ tia a hming an vuah chu kumin February-ah a sak hna tan an tum thu PC party Treasurer chuan a sawi a, an zawh hun tur erawh chu hruaitu leh member te phûr leh inpêk danin a hril dawn niin a sawi bawk.
Zirtawpnia PC party office hlui thlahna inkhawmah hian PC party office hman lai satu, Minister hlui C. Chawngkunga, Minister hlui dang F. Malsawma, MLA hlui Dr. JV. Hluna leh Hriata Chhangte te bakah PC party hruaitu hlui ten thu an sawi bawk a ni.