Aizawl: ZPM Leader Lalduhoma chuan, sorkarin taxi permit vawi khat chiah renew theiha a kalpui mek chungchangah an thu a la ngai reng a, an sorkar chuan he harsatna sukiang turin ruahmanna an siam dawn tih a sawi.
ZPM hruaitute hian nimin khan Dawrpui-a Mizoram Taxi Association (MTA) pisa tlawhin an hruaitute nen an inkawm a. He hunah thu sawiin Lalduhoma hian, tuna taxi permit vawi khat chiah renew theiha sorkarin a kalpui mek hi AMC election atang tawh khan thlak turin an lo tlangaupui tawh tih sawiin, “Kan thu kha a la ngai reng a, kan lo sorkar ve a nih chuan he harsatna sukiang tur hian ruahmanna kan siam dawn a ni,” a ti.
Sum siamna atana permit hman hi tha an tih loh thu leh eizawnna nghet miin a neih theihna tur hi an ngaihtuah pui ber nia sawiin ZPM Leader hian, “Lirtheia eizawngte an motor a fit chhung chu replace theih turin ruahmanna siam kan tum dawn a ni. Intlan chhawk chungchang erawh a mimalin thutlukna ka siam thei lo a, kan hotute leh helam khawihtu department nen ngun taka ngaihtuah tlan ngai thil a ni dawn a ni,” a ti bawk.
ZPM leader tawiawmtu Lalchhuanthanga, MLA pawhin, lirthei hmanga eizawng mek leh kut hnathawktute ngaihsak tak tak lo sorkar zel hi ramin a la hrawn niin a sawi a. Tuna sorkar mek phei chuan kut hnathawktute eizawnna ber bazarpui pawh a sa thar hlei thei lo a, vawi tam tak an aupui chung pawhin awmzia a awm hlei thei lo tih a sawi a. ZPM hi an lo sorkar a nih chuan tih tura an intiam chu an tihlawhtling ngei an tum dawn niin a sawi.
Inkawmna hi Ralthanmawia, President, MTA chuan kaihruaiin F Lalruatfela, General Secretary, MTA, chuan an pawl dinhmun te a sawi ve bawk.