ZPM Leader Lalduhoma chuan ZPM chu danglam tura mipuiin an beisei leh an phut avangin an danglamna tur hi an thupui tur a nih thu a sawi.
Nimina ZPM chhung inkhawmah thu sawiin Lalduhoma hian, inthlan kum a nih avangin puan in zauh a tul tih sawiin, “Kan danglam ngam tur a ni, kan danglamna hi kan zawrh a ni. Kalphung thar kan tih pawh hi danglamna a ni. Miin ZPM chu danglam turin min beisei a, a phutin min phut a; chuvangin, kan danglamna tur hi kan thupui tur a ni,” a ti.
Zoram mipuiten tun laia an vei ber chu sorkar tha siam, a tha zawk din duhna leh ram tha zawk thlen duhna avanga tuihalna a lian ta em em nia sawiin, “Kan sorkar lo hrawn tawhte ang ni lo, ‘A aia tha deuh zawk tal’ tih hi mipui rilruah a awm a ni. Chuti a nih loh chuan mipuiten kan ram hi an ngaihtuah a ni,” a ti.
Lalduhoma hian, ram politics tualzawl a bawlhhlawh a, mi tha tam tak an luh duh loh avangin mi tha tam tak ramin a chan mek a, hei hi siam that vat a nih loh chuan buaina nena sorkar thlak thut duhna (revolution) a ngai ang tih a hlauhawm tih a sawi a. Politics tha mi, mi tha zawkte pawhin telna tlaka ngaih an siam a ngai a, chutiang tur chuan ZPM hi mipuiin an en mek a, tha zawk tura an beiseina leh duhna a lian hle tih a sawi.
ZPM Leader hian MNF sorkarin an term chhungin Assam leh Mizoram ramri chinfel loh hram dan ngaihtuahah puhin, “Assam nena kan ramri nia kan sawi a in ang tlat lo hi kum 58 chhung kan buaina a ni; hei hi sawi fel a ngai,” tia sawiin, nikum November khan thla thum chhungin ramria mipui leh khua awmdan (geo spatial extent) chian a ngai tih sorkarin a dawng chungin, thla hnih aia tam a ral hnuah kumin January 20 khan committee a ko chauh a, zirchiang tur committe a din chauh niin a sawi a. “Hei hi zirchian hman ngaihna a awm tawh loin a lang a, kan sorkar hian an term chhungin ramri hi chin fel loh hram dan a ngaihtuah niin a lang,” a ti a ni.