Aizawl : BJP Mizoram President Vanlalhmuaka chuan, IOC leh gas dealer thenkhatin PM Ujjwala Scheme a nih ang tura an kalpui loh chungchangah January thla ral hmain sorkar laipuia thuneitute hnenah report an theh lut dawn tih a sawi.
BJP State office, Atal Bhawan ‘Mipui Run’ a nimina chawlhkar thar inhlanna inkhawmah thu sawiin Vanlalhmuaka hian, India rama BJP sorkarna state hrang hrangte rualin Mizoramah pawh eirawngbawlna gas la neilo te’n an neih theihna turin Prime Minister Narendra Modi-a’n Gas dealer te kaltlangin free gas connection a pe chhuak mek niin a sawi.
Vanlalhmuaka hian BJP Sorkarna state-ah chuan Free Gas Connection mamawhtu te pek kim an ni chho tawh nia sawiin, “Keini state-ah erawh IOC leh Gas dealer thenkhatin PM Ujjwala Scheme hi a nih ang tura kalpui lo in, an ngaihsak tha lo a. PM Scheme a nih dan tura kalpui tha duhlo Gas Dealer-te chu Ministry-in hma an lak theih nan report tura min tih angin, January thla ral hmain report hi kan theh lut dawn a, PM Scheme ngaih pawimawh loh avanga tuar kan lo awm a nih chuan dealer te thiam loh a ni ang,” a ti.
Thenawm state, a bikin Mizoram ang thoa Kristian tamna Nagaland, Meghalaya, Manipur, Arunachal Pradesh ah te chuan BJP sorkar hnuaiah a takin PM scheme an kalpui avangin, miretheite’n thawvenna an chang a. Mizoramah erawh a fatute’n miretheite chanai an ei zawh avangin harsa takin vawiin thleng hian an la awm avangin, kum 2023 MLA election-ah hian Mizoramah miretheite tan thawvenna a lo thlen theih nan leh hmasawnna dik, good governance neih theih nan BJP sorkar a mamawh tih a sawi bawk.