Aizawl: Kumin March 3-a Chapchar Kut lawm dan tur relin nimin khan Chapchar Kut Organizing Committee chu an chairman Zoramthanga, Chief Minister hoin an thukhawm.
CM Office Conference Hall-a thutkhawmah hian hripui leng avanga kum hnih chhung Chapchar Kut hman theih a nih loh hnuah kumin hian boruak a ziaawm tak avangin, a hmaa lo tih thin angin huam zau taka hman ni leh an rel a. District tin leh state pawna Chapchar Kut lawmna pual sum hman tur chungchang te sawiho niin, a lawmna pui ber Aizawl Lammuala hman dan tur chu programme committee kutah dah a ni.
Kumin Chapchar Kut thupui (theme) atan ‘Zofate Inpumkhatna’ thlan a ni a. Chapchar Kut Souvenir siam leh rel ni bawkin, hetah hian kumina Kut hmanna hlimthla te chuangin post-souvenir a siam leh ni se tih a ni. Kut pual hian mahni remchan dan anga hnam thuam inbel tura inngen an rel bawk.
Chapchar Kut Organizing Committee ah hian Chief Minister chu Chairman niin Art & Culture Dept. Minister chu Co-Chairman a ni a. Art & Culture Secretary chu Vice-Chairman niin, CYMA GS chu Secretary a ni a. Art & Culture Dept. Under Secretary chu Asst. Secretary niin Art & Culture Dept. Deputy Director/DDO chu Treasurer a ni.