National Student’s Union of India (NSUI) Mizoram State chuan nimin khan an president RB Lalmalsawma hoin Lengpui Airport an tlawh a, khualzinte bungraw nawrna trolley indaih lohna a nasat thu leh hmantlak 25 chauh a awm niin an sawi.
NSUI(Mz) hruaitute hian Lengpui Airport-a khualzinten bungraw nawrna trolley indaih lohna avanga harsatna awm thei te an enfiahin, trolley chhia tam tak an hmuh bakah, a hmantlak 25 chauh a awm tih an sawi a. Lengpui Airport chei that mekah a ban khuhna bungraw tha ber chi Armstrong Company hman tur a awm reng laiin, a chhe chi Alstrong Company hman a awm nia an hriat thu an sawi.
RB Lalmalsawma chuan, “Lengpui Airport-a trolley indaih hman tur a awm loh chhan leh a chhiat nachhan chu Lengpui Airport chei that hna thawk mektu contractor-ten cement leh an hnathawhna hmanraw rit tak tak nawrna atan an hmang thin a ni,” a ti a. Mipui hman tur indaih awm lo khawpa contractor, Kamrula ten trolley an hmang chhia chu a hriatthiam loh thu sawiin, a tichhetu contractor hian ni 15 chhungin a tira awm zat vel trolley thar dah phutin, hun tiam chhunga an ti duh lo a nih chuan NSUI (Mz) hian a tawp thlengin hma an la zel dawn niin a sawi.