German Foreign Minister Anna Baerbock-i chuan an tank siam, Leopard 2 chu Poland-in Ukraine puih nana thawn a tum a nih phawt chuan ‘dan a tum lo’ tih a sawi.
Ukraine hian German siam tank hi khawthlang ramte hnenah hmantir tura ngenin, Russia an hneh theihna tur niin a sawi.
Hetih lai hian Germany chuan tun thlengin a la pe lo va, thawn chhuahna dan an zamah an lo leitir tawh ramte pawhin mi danga pek chhawn a phal lo bawk.
Pathianni khan Baerbock-i chuan Poland hnen atangin thawn chhuah chhawn dilna an la dawng lo tih a sawi.
France-a LCI TV-in an biaknaah, “Tun thleng chuan eng zawhna leh dilna mah kan la dawng lo va, min dil an awm a nih erawh chuan kawng dal kan tum lo,” a ti.
Kar hmasa khan Polish Prime Minister Mateusz Morawiecki chuan Germany-in phalna a pe a nih phawt chuan Kyiv hnenah hian Leopard 2 tank 14 lai pe turin an inpeih reng tih a lo sawi tawh.
“Ukraine-a zalenna humhim theih danah a innghat,” a ti.
Leopard 2 hi tuna Russia-in Ukraine a rûn meknaa a hman, T-90 el phak tank el phak tura duan a ni.
Khawvelah 2,000 vel awm anga ngaih a ni a, Ukraine President Volodymyr Zelenskyy-a chuan heng zinga 300 tal an hmang thei a nih chuan Russia an hneh theihna tura tangkai tak a ni dawn tih a sawi.
Hemi chungchangah hian Ukraine tanrualpui ramte chuan a siamtu, Germany chu an ngaichang thup a, anmahni takin thawn thei se an duh.
Tuna inkaihhruaina an neih mekah chuan an lo leitir tawh ramten an thawn chhuak chhawng leh a nih chuan Berlin hian a hrek thei dawn a, chu chu Poland leh ram dangte pawhin an ngaihchan chhan a ni.
Zirtawpnia ram tangrual 50 chuangte an thutkhawm hnuah pawh Germany hian Kyiv-a ama puala thawn emaw, ram dangin an pek chhawn emaw chungchangah thu a la nei lo va. Thawn chhuah phal lo anga sawina erawh a pha thung.
Inrinnia Estonia, Latvia leh Lithuania foreign minister-ten thuchhuah intawm an siamah chuan Germany chu ‘tunah Ukraine hnenah Leopard 2 tank pe nghal turin an ti’ tih a tar lang.