Premier League title inchuhnaah Arsenal in dinhmun tha an luah chhunzawm a, an hmahruaina ti fal turin inkhel hmuhnawmah Manchester United 3-2 in an hneh.
Pathianni zana Emirates Stadium a tun season inkhel nghahhlelh hlawh takah Arsenal in minute 90-naah chakna goal an khung a. Inkhel tan atanga tawp thlengin a hmuhnawm tluan.
Fiahna chu
Pahnihna a awm Manchester City in inkhelh hma a Wolverhampton Wanderers an hneh avangin Arsenal tan chak a pawimawh. Chutihrualin an hmachhawn tur United team hi tunhnaia hmasawn tak an ni a, an tan hna hautak a tling dawn.
Gunners in champion zia lantirin dinhmun harsaah an ding hmasa zawk a, amaherawchu an thochhuak thei.
Minute 17-naah Marcus Rashford chuan a chetthat chhunzawmin meter 23 a hla atangin goal mawi a pet lut a. Mikhual team in hma an hruai.
Mahse an lawm rei lo. Arsenal an chiai lova, minute sarih hnuah Granit Xhaka ball cross atangin Eddie Nketiah chuan an si phurh a sut.
Second half-ah Bukayo Saka chuan United lakah a chetthat zan a hmang leh a. An goal hnihna mawi zet maiin a khung.
Gunners pawh hian hma an hruai rei bik lo. Nipui laia Arsenal hnawl a United pantu Lisandro Martinez chuan a club tana a goal hmasa ber a khung a. 2-2 a ni leh chiah.
Hun tam zawk chhunga chungnung zawk Arsenal an hlauhawm tual tual a. Chakna goal khung tumin goal an bawh na. An tum a hlawhtling a, Nketiah bawkin minute 90-naah United player te ball chan theih loh rah sengin chakna goal a khung.
Arsenal manager Mikel Arteta chuan inkhel zawhah a player te rilru paukhauhna chu a fak.
“Goal kan chhuah hnua an inkhelh dan kha ka beisei piah lam a ni. Football rang leh hlauhawm khel turin kan infuih thin, he team-ah hian chutiang ti tur chuan chakna kan nei a, kan tih ngam avangin vawiin inkhelah result tha a lo thlen phah.” a ti a.
“League-ah tumah kan inhlat lova, vawi khat chak, tlawm emaw draw in awmzia a nei hle.” a ti bawk.