BJP Mizoram Pradesh General Secretary Malsawmtluanga’n Mamit bial fang a, khaw hrang hrangah booth level meeting a neihpuinaah district hnufual (aspiration district) atanga Mamit district khai chhuah chu BJP thil tum a nih thu a sawi.
Malsawmtluanga chuan, “Mamit district hi India ram district hnufual zinga kan tel avangin hemi lak atanga chhanchhuah hi BJP chuan kan tum a ni a. BJP atang lo chuan Mamit bial mai bakah Mizoramah pawh retheihna atanga chhanchhuahna hi a awm thei dawn lo a ni,” a ti.
Thenawm state-ah mipui tan kawng hrang hrangin hmasawnna a kal mup mup laiin Mizoramah erawh hmasawnna hnathawh a awm mumal lo chu kuthnathawktu tam zawkte tan harsatna a thlen a, hei hi BJP chuan a ngai pawimawh tih a sawi a. Mizoramah BJP-in thuneihna changa an sorkar chuan kawng tha awm mumal lohna thingtlang khaw penhleh thlengin, an sorkar kum khatnaah siam that hna an thawk nghal dawn tih a sawi bawk.