Aizawl: School Education Minister Lalchhandama Ralte-in primary school-a Hindi zir a nih theih nan central-ah primary hindi teacher an dil mek thu a sawi.
Thawhtanni zana Mizoram Hindi Prachar Sabha Chairman RB. Lalmalsawma nen an inkawmnaah minister chuan a sawi a. “Hindi hi Zofaten kan thiam ngei a tulin a pawimawh a, chumi atan chuan a tul angin hma kan la,” a ti.
Education minister chuan primary hindi teacher an dil mekah an hlawhtlin ngei a rin thu a sawi a. Mizoram Education Services Rules buaipui mek a nih thu a sawi bawk.
Mizoram Hindi Prachar Sabha chairman chuan education department hnuaia Hindi Wing, deputy director-in a awp mek chu joint director level-a tisang tur te, Hindi teacher post nghet hnawh khah loh tam tak hnawh khah a tul thu te, CSS hnuaia Hindi teacher post la hnawh khah loh hnawh khat thuai tur leh CSS Hindi teacher-te hma lam hun uluk taka ngaihtuah a tul thu te minister hnenah hian a thlen a. Mizoram Hindi Prachar Sabha staff-ten rei tak hlawh an lak tawh loh pawh pe chhuak thuai tur leh staff pawh pek belh turin a ngen bawk a ni.