Inter Milan in second half-ah goal an chhuah avangin a zawna match sarih tlawm lova an kal lai chu a tawp a. 1-0 in Empoli lakah an tlawm.
Thawhtanni zana San Siro a Serie A inkhelah Inter hian first half tawp dawn lamah red card an hmu a. Captain Milan Skriniar chuan Francesco Caputo tana hlauhawm taka ke a khai avangin yellow card a hmu nawn.
Second half-ah tam zawk an nih hnuah Empoli in goal an khung a. Chance tha an hloh nual hnuah kum 19 mi midfielder Tommaso Baldanzi chuan substitute bench atanga dah luh a nih hnuah goal a khung.
Inter in Edin Dzeko leh defender Stefan de Vrij te hmangin an si phurh an sut teuh a, de Vrij-a’n goal bar a tauh per.
Empoli coach Paolo Zanetti chuan, “San Siro a hnehna chan hi keini tan chuan duhthusam a ni a, zaninah ka player-te a tak ram an chantir. A tir darkar chanve chhung kha kan kheltha tak zet a, kan tih tur tak kan ti thlap thlap thei.” tiin an chak hnuah a sawi.
Inter coach Simone Inzaghi chuan an tlem zawk chuan inkhel a nghawng tih a pha lo. “Kan tlem zawk na khan danglamna tam tak a siam. Super Cup kan chawi vang a ni a, kan hlawtlin hnuah training kan nei lehnghal hma hle.” tiin a sawi ve bawk.