Aizawl: Ni hnih awh tur, Pachhunga University College Research Conclave chu nimin khan Higher & Technical Education Minister Dr. R. Lalthangliana’n a hawng a. “Finna leh hriatzauna chu research atanga lo kal a ni,” a ti.
Research Conclave ni khatna PUC Seminar Hall-a neihah hian H&TE minister chuan, “Zirbingna – research chuan kan ni tin nunah nghawng nei lo angin lang mah se khuareiah changkanna, hmasawnna kawngah min hruai zel thin,” a ti a, finna leh hriat zauna chu research atanga lo kal a nih thu a sawi.
Minister chuan PUC-in tun dinhmuna research scholar 61 an nei thei leh thla tin international research paper tichhuak thei zirna in an ni leh kum ruk kalta chhunga journal leh lehkhabu publication 750 chuang an nei thei chu hlawhtlinna ropui tak a tlin thu a sawi a. Tun hnaia College faculty thahnem tak an la thar pawh lawmpuiin NAAC Accredited A+ mai ni lo, A++ hmuh belh zel tura tang sauh sauh tur leh research project 40 kal lai mek leh research proposal an neih zawng zawngah duhsakna a hlan bawk.
PUC Research Conclave hawnna inkhawm hi Prof. Rinpari’n kaihhruaiin, Principal Prof. H. Lalthanzara pawhin thu a sawi a. Dr. H. Laldinmawia’n khaw pali – Phulpui, Lungleng, Dulte leh tun hnaia an adopt, Khawrihnima an hmalakna hrang hrangte sawi bawk a ni.