Mizorama kohhran hrang hrang hruaitute chu nimin khan inzawmkhawm dan tur ngaihtuahin an inrawnkhawm a. Mizorama kohhran hrang hrangte inthlunzawmna ‘church council’ din an rel.
Kohhran hruaitute inrawnkhawm hi Mizoram Baptist Kohhranin Sap Upa leh Pu Buanga Hall, Serkawn-ah thlengin, Synod Moderator Rev. Dr. C. Chawnghmingliana’n a kaihruai thung.
Baptist Church of Mizoram (BCM) hmunpuia kohhran hrang hrang hruaitute inrawnkhawmnaah hian a thlengtu, BCM hruaitute bakah Presbyterian Church of India, Mizoram Synod (PCI), Evangelical Church of Maraland (ECM), The Salvation Army leh Lairam Isua Krista Baptist Kohhran (LIKBK) aiawh kohhran hruaitu paruk theuh an tel a ni.
Kohhran hruaitute hian kohhran inpumkhatna tura pawimawh hrang hrangte sawiho nghalin a langsar zual zingah inpumkhatna pawl hming tur chungchang te, eng chinah nge inzawmkhawma inpumkhatna kalpui tur a nih te, a umzuitu committee din chungchang te a tel.
Church council din tha an ti a, a ruangam duangtu tur committee pawh din nghalin nimina an sawiho leh ruahmanna an siamte chu kohhran hrang hrang aiawhte chuan anmahni kohhran rorelna sang berah theuh an thlen ve leh ang.
Kohhran hruaitute inrawnkhawmna hi Mizoram Synod Inkhawmpui 2015-in, ‘Kohhran inpumkhatna’ a lo rel tawh te, Mizoram Baptist Kohhran Assembly 2021-in, ‘Mizorama kohhran hrang hrangte inpumkhatna leh thawhhona tha neih zel theih nan ‘Council of Churches in Mizoram’ din a lo rel tawh te leh kohhran pawl dangte pawhin Mizorama kohhran hrang hrangte inzawmkhawm dan an lo ngaihtuah fo tawh thin bawhzuina kal zel a ni.