Aizawl: Mizoram People Forum (MPF) leh political party-ten inthlan chungchanga thawhhona thuthlung an siam chu nimin khan an thlirho.
MPF President Rev Dr Vanlalnghaka Ralte kaihhruaia Synod Committee Room No. 1-a thutkhawmah hian MPF Governing Board member bakah political party hrang hrang – MNF, Congress, ZPM, BJP leh PC party aiawh mi pahnih theuh an tel.
Nikum November 29-a thawhhona thuthlung chungchang an sawiho tuma rawtna awmte a thuphunga pawmin rawtna dang nei duh political party zingah an awm a nih chuan tun thla chhungin MPF-ah thlen ni se an ti.
Rawtna dang lut a awm a nih chuan thutkhawm leh kher ngai lova rawtna lutte chu siamr em theih a nih chuan thawhhona thuthlung chu ziah mai ni se an ti a. Political party office tinah kalin president theuhte hming ziahtir mai turin an ti a ni.
MPF leh political party aiawhte hian inthlan chungchanga thawhhona thuthlung bakah MPF-ah kohhran pawl dang la tel lote an tel ve ngei theihna tura chak taka hmalak an rawt bawk.
Thutkhawm kaihruaitu, MPF President Rev Dr Vanlalnghaka Ralte chuan MPF leh political party-ten thawhhona thuthlung an buatsaih chu anmahni hming ziahhnan ngei a nih dawn avangin a hlawhtlin theih nan theihtawp chhuah tlan a tul thu a sawi a. A hlawhtlinna tura tan la tlang turin political party-te chu a chah bawk a ni.