India-Myanmar ramri hung hna thawh meka Pillar No. 81 hnaiha cheng, Manipur-a Kwatha Khullen khua leh Myanmar-a mite chuan ramri chungchangah inrem lohna an neih avangin hna thawh chawlhsan a ni.
Ram pahniha khuate inrem hma chu hna hi thawh chhunzawm rih loh turin an ti.
Indian-te chuan Manipur sorkar hnenah India ram chin metre 30 vel zet chu Myanmar ram chinah rin luh a ni tih an thlen a. Hei hian Chindwin River (Manipur-a Ningthi tia an sawi) peng, Namjellok kam vel pawh a huam niin an sawi.
Pillar No 81 ramri hung hna hi Border Road Task Force (BRTF)-in an thawh mek a ni a. Manipur-a ramri khaw hnih, Kwatha leh Kwatha Khullen-a mite chuan chin fel a nih hma chu hna thawh chhunzawm an phal tawh lo.
Indian thuneitute chuan Manipur sorkar hnenah hian team an tir tawh a, thil thlen dan leh awmzia enpui turin a ti.
Sorkar aiawh hruaitu, Manipur Tribal Affairs & Hills Horticulture leh Soil Conservation Minister Letpao Haokip chuan Thawhtanni khan buaina hmun hi a hote nen an tlawh tawh a. Ram pahniha cheng ve veten inremna a rang thei anga an siam theih dan tur ngaihtuahin inremna a awm hma chu hna chawlhsan rih turin an ti.
Kwatha Khullen-a kumupa zawkte chuan Manipur-a lal hriatrengna lung phun pawh Myanmar ramah a awm daih tawh thu an lo sawi.
Team pawhin thil awm dan an enin hna chu thawh chhunzawm rih loh phawt turin an ti ta rih a ni.