Aizawl: Thawhlehni tlai khan union minister hlui, Puducherry chief minister hlui ni bawk, V. Narayanasamy chuan Congress Bhavan-a tlawh a, MPCC hruaitute nen an inkawm.
Narayanasamy chuan MPCC hruaitute hmaah thu sawiin India ram mipuite inpumkhat lehzual tura tanrual a ngai hle tih a sawi a. “BJP sorkara Prime Minister Narendra Modi leh Home Minister Amit Shah te hnuaiah hian India ram mipui min then hrang nasa a. Chi leh chi inthliarna bakah Kristiante tih duhdahna a hluar a, RSS hmangin India ram mipui min then hrang mek a ni,” a ti.
BJP hian Hindutva an tih hmangin Hindu tihlarna leh India ram mipui Hindu nihtir tumna an kalpui mek nia sawiin, “Father of the Nation, Mahatma Gandhi chuan zalenna sual lai khan zalenna chauh ni loin mipuite inpumkhatna thu a auchhuahpui nasa em em a, a nunna hial a chân phah a nih kha. Khatiang kha tun hunah hian a thleng leh ang tih kan hlau a ni,” a ti.
BJP sorkarna ramah thil man a to em em a, heti chung hian kum khata an sum thawhchhuah tura an sawi pawh an la lut lo niin a sawi a. “Anmahni an hausa a, mipui kan rethei a ni. India ram mipui inpumkhat theihna atan leh zalenna atan India rama BJP sorkar hi kan nawr chhuah ngei ngei a ngai a ni,” a ti bawk.
Narayanasamy chuan Modi hi eiruk thubuaiah chargesheet mek a nih thu leh Mizoram sorkarna siamtu, MNF pawh eiruknaah an fihlim lo hle nia a lan thu a sawi a. MLA General Election 2023 lo awm turah pawh an tlak ngei a rin thu leh Congress party-in hnehna an chan ngei a beisei tih a sawi.
Narayanasamy hi nimin khan Lengpui Airport-ah a tum a. India ram inpumkhat a tulzia aupui tura zin a ni.
He inkawmnaah hian Lalsawta, President, MPCC leh Congress party hruaitu thahnem tak an tel a ni.