Chief Minister Zoramthanga chuan nimin khan MHIP Ramhlun Venglai Branch Silver Jubilee lawmna inkhawmah khuallian niin a hmanpui a. Ruihhlo bakah zuk leh hmuam laka indopui puan a hun tawh tih a sawi.
PCI Ramhlun Venglai Centenary Hall-a Silver Jubilee monument hawnna pual inkhawm buatsaihah chief minister chuan hmasawnna atan taksa hrisel a pawimawh thu a sawi a. Mi mal, chhungkua leh khawtlang hmasawnna atana hriselna chu a pawimawh avangin ruihhlo mai bakah zuk leh hmuam laka fihlim chu chonaah lain, mi dang kaihruaitu ni turin kalkhawmte chu a chah.
CM hian mihring hi a mal ringawta a awm chuan an chak tawk lo thin a, inzawmkhawmna hi chakna a ni tiin, MHIP-ten khawtlang nun hmasawnna atana pawl anga hma an lo lak tawhna te chu lawmawm a tih thu a sawi.
Khuallian hian MHIP In, Ramhlun Venglaiah Jubilee Monument a hawng a. Jubilee hi ni hnih chhung lawm a ni.