Ni thum kaltaa DR Congo rama tlang kang vangin mi 32 an thi tawh a, an chhungte bo zawngin mi tam tak an hmanhlel bawk.
Mount Nyiragongo chu Inrinni zan khan a chhehvela mipuite inrin hmain a irh chhuak vak a, a bulhnai khuaa mihring chenna in 500 dawn lai a tichhe tawh tih thuneitute leh a mi chengten an sawi.
Tlang kang avanga thi hi mi 22 atang 32 an ni tawh niin an sawi a, hei aia tam hi an ni lo vang tih a sawi theih loh tiin North Kivu province-a Civil Protection hotupa, Joseph Makundi chuan a sawi.
“Insaseng an tumna lamah lirthei hmanga an chetsual vangin mi 10 laiin nunna an chân a, thenkhat erawh chu tlangkang irhchhuahin an chenna in a den fuh vang a ni,” a ti.
Volcanic Observatory of Goma Scientific Director Celestin Kasereka Mahinda chuan Thawhtanni khan lei sa dai tawh lam hnaiha kalten gas hlauhawm leh a khu an hip luh avangin an thi nual niin a tar lang bawk.