Aizawl : Govt. Aizawl College (GAC) pilot survey of adopted village & school bultanna hun chu nimin National tourism day-ah khan Hmuifang tourist resort conference hall-ah buatsaih a ni a, Tourism Minister Robert Romawia Royte-in a hmanpui.
Tourism Minister chuan kalkhawmte chu National tourism day chibai bukin, GAC-in Hmuifang khawtlang tana an thil tih chu tha a tih thu sawiin a fak a. Hmuifang khua leh GAC chu an inremna tihlawhtlingtu ni ve ve turin duhsakna a hlan.
College zirtirtute leh zirlai kalkhawmte chu ruihhlo do kawnga thahnemngai taka tan la turin Tourism Minister chuan a sawm a. Mizoram chhung leh ram pawn atanga khualzin lo kal te chu Kristianna leh Mizo hnam leh ram venhimna rilru pu chunga lo lawma, lo dawnsawn thiam tum tur leh lo tawiawm thiam tur pawhin a ngen.
Robert Romawia chuan “Midangte tana inpekna hi mahni nunah a lo let leh thin” tiin, midangte tana GAC inpekna chuan College-ah rah tha a chhuah ngei a beisei thu a sawi bawk.
GAC Vice Principal Lalbiakzuala’n GAC-in kum 2019 atanga Adopted village atana Hmuifang khua an thlan thu leh inremna tumhnihna atan an ziah leh thu a sawi a. Hmuifang khawtlang mipui ten kawng hrang hranga hma an sawn theihna atana thlan an nih chhan tlangpui sawiin, Hmuifang khaw mi Govt. Aizawl College-a zir reng reng chu a thlawna admission pek an nih thu te, kum khatah a thlawna inentirna, medical free clinic tum hnih neih tum a nih thu te a sawi.
Hmuifang VCP Lal- ruatfela pawhin khawtlang aiawha lawmthu sawiin, Govt. Aizawl College nen an inremnate hlawhtlinna tura theihtawp chhuah an tum thu leh thawhhona tha an neih zui zel a beisei thu a sawi bawk.