India leh Pakistan chuan an inrina, Line of Control (LoC) leh sector dangah pawh, inkahhai puan mek bawhchhiaa inkahna a awm tawh lohna turin inremna an siam.
Nimina thuchhuah intawm an siamah inkahhai hi Nilaini zan zanlai atanga kalpui tan tur a ni a, ram pahniha Director General of Military Operations (DGMO) inbiain inremna hi an siam.
Dan pangngaiah chuan India leh Pakistan hian kum 2003 daih tawhah khan inkahhai hi an puang tawh a; mahse, thu leh lehkha mai a ni deuh chauh va, a takah chuan vawi tam tak an inkap.
DGMO pahnih inbia hian hotline hmanga inbiakpawh dan tur leh LoC bakah sector dang dinhmunte thlirin, ‘Zalen, tlang leh inhriat thiam tawnna’ a awm theihna turin ruahmanna an siam.
“Ramria muanna leh boruak tha a awm theih nan DGMO pahnihte chuan an ram ve vea muanna tichhiaa tharum thawhna thlen theite harsatna awmte an en fel ang.
“Lehlam lehlam hian LoC hrul leh sector dangah pawh January 24/25 zan lai atanga silai a puah tawh loh nan inremna an siam,” tiin thuchhuah intawmah hian tar lan a ni.
Ramri-ah hian hotline hmanga inbiak leh border flag meeting an neihte chu nakin zela harsatna a awm pawha inbiakna hun remchanga hman turin an ti bawk.