Aizawl: I&PR Minister Lalruatkima chuan chanchinbumite chu sorkarin khalh ngil a ngaihna apiangah huai taka sorkar khalh ngil hna thawk zel turin a chah.
Nimina MJA Kolasib District-in Kolasib MJA Press Club-a inkhawmpui an neihah khuallian niin I&PR minister hian a hmanpui.
Thu sawiin thu thar lak khawm hna chu hna zahawm tak niin, chu zahawmna hum tur chuan dikna leh rinawmna vawn nun tlat a tul thu a sawi a. Taimakna leh teirei peihna nen a thu thar theh darh hna thawktute chu ram leh hnam tihhmasawnna kawng a thawktu pawimawh tak an nih thu a sawi.
Lalruatkima hian India danpuiin zalenna zau tak a pek hmangin ram siam that hna an thawh rualin heng zalenna hmang sualtu ni lo tur te, sorkar khalh ngil a ngaihna apiangah huai tak khalh ngil hna chu thawk zel tur leh khawvel changkannain a ken tel thiamna hrang hrangte hmang tangkaitu ni zel turin chanchinbumi kalkhawmte a chah.
Minister hian Mizo tawng humhalhna kawnga mawhphurhna thui tak chu chanchinbumite kutah a innghat a, Mizo tawng dik hman leh ziah dan dik hmang tur a mipui kaihruaitu nih a pawimawh thu a sawi.
MJA General Headquarters President C.Lalrambuatsaiha pawh thu a sawi a. Chanchinbumi hlawtling ni tur chuan mi dangte aia taimak chhuah a, thu rintlak, belhchiandawl leh tangkai ziah a pawimawh thu a sawi a. Thil chikmi leh zir peih nih a pawimawh bak ah khawvel changkanna ina a ken tel thiam thilte chu hman tangkai thiam a pawimawh thu a sawi.
He hunah hian Andrew VL Auva, President, MJA, Kolasib pawhin, chanchinbumite chu ram rorelna kawng a thawktu pawimawh hlawm li zinga hlawm khat luahtu hial a chhal an nih thin thu sawiin, chanchibumite chu ram khalh ngiltu, khawtlang rilru sukthlek kawng dik a kaihhruai hna thawktu pawimawh tak an nih thu a sawi bawk.