Aizawl : Mizo ṭhalai, Japan rama Nurse hnathawk tur mi 14 te chu NSDC-I tumsaka Delhi-a Japanese tawng thla 9 chhung zir turin nimin khan Labour, Employment, Skill Development & Entrepreneurship (LESDE) Minister Lalchhandama Ralte-in a vailiam.
Sorkar thuchhuahin a tarlan danin Japan leh India sorkarin thawhhona thuthlung an siam angin Japan rama Nursing care hna thawk tur thawnluh hna chu National skill development council-international (NSDC-I)-in a kalpui a. India rama a pilot programme atan Nurse 50 thawnluh phawt tum a ni. LESDE department hmalaknain Mizo ṭhalai 6 kaltir tawh niin, nimin khan mi 14 kaltir leh an ni.
LESDE Minister Lalchhandama Ralte chuan Japan rama Nurse hnathawk tura kal tur te chu Mizoram tan Ambassador an nih thu leh Mizo thalai tam tak te tan eizawnna kawng sialtu pawimawh an nih thu hrilhin, rinawm leh taima taka thawk turin a chah a. An hnathawh leh an nunah Kristian an nihna miin an hmuh ngei theihna tura tawngtaia Pathian au fo turin a chah bawk.
Mizo thalai 14 te hi thla 9 chhung training an neih zawha an thawhna tur biakfel sa hmun te sorkar-in a enfelsak hnuah Japan ramah hnathawk turin kaltir an ni chauh da- wn niin sorkar thuchhuah chuan a tarlang a. An kalna senso leh tuldang chu an thawh na tur ten an tumsak vek dawn niin sorkar thuchhuah chuan a tarlang bawk a ni.