Japan leh South Korea chuan khaw chhe tak hnuaia bungraw phur lawng lian pila thawk mi pakuate zawn hna an thawk mek.
Japanese leh South Korean chanchinbute chuan tonne 6,551-a rit, Jintian lawng hi Japan-a Nagasaki bul tuipuiah a pil tih Nilaini khan an tar lang hlawm a, thawktu mi 13-te chu chhan chhuah theih nghal an ni.
An zinga pangate hi an hnaiha lo awm lawngten chhan chhuakin mi pariatte erawh a hnuah Japanese leh South Korean coast guard-in an chhan chhuak thung.
Japanese thuneitute chuan Hong Kong lawng liana thawk zinga mi 14 chu Chinese an nih thu leh mi dang pariat chu Myanmar ram mi an nih thu an sawi.
Kyodo news agency chuan Jintian-a thawkte hian Thawhlehni zan tlai tawh takah khan an mangan thu thawn chhuakin an lawng chu ‘a derthawngin tui a luh nasat tawh thu’ an sawi niin a tar lang.
An mangan thu an thawn chhuah atanga darkar li hnu velah a pil ta tih a tar lang bawk.
South Korean thuneitute an sawi dan chuan lawng captain-in satellite phone hmanga Jeju Island-a coast guard a biak hnuhnung ber chu Nilaini zing dar 2:41 (India-a Thawhlehni zan dar 11:11) a nih thu leh thawktute chuan an lawng chu an kalsan tak mai thu hrilh.
South Korean Coast Guard-ten a hmun an thlen chuan lawng chu a lo pil fel vek tawh niin Yonhap news agency chuan a tar lang.
Coast guard hian a vela life raft pathum leh lifeboat pahnih an hmuh hmasakah chuan tumah mihring hmuh an nei lo.
Thing phur Jintian lawng pil chhan dik tak hi engmah hriat theihna a la awm lo.
Chhiatna thlen hun hi khaw vawt takin Japan leh South Korea a tuam lai niin hmun thenkhatah vur a tla a, chhunah pawh chhan chhuah hna thawhna hnaih thliarkar chu 3C vel lai a ni.
Lawng a pilna lai hi Nagasaki leh South Korea-a Jeju Island inkar a ni a, khaw awm danin a zir loh em avanga thlawhna thlawk chhuak leh lut tur pawh thahnem tak an lo thulhtir tawhna lai a ni.
Japanese Coast Guard chuan lawng miten an mang an thu a thawn a dawn lai hi thli na tak a tleh lai niin an sawi.
Patrol boat leh thlawhna hmangin thawk chhuak nghal mah se khaw awm danin a zir loh em avangin an thleng hma thei lo niin an insawi.