India leh Pakistan ramri-ah hian kum thum liam ta chhungin inkahhai bawhchhiatna vawi 10,752 zet a thleng niin India chuan a chhinchhiah.
Parliament rorel inkhawm neih meka tun thla tira ziaka zawhna a chhannaah Lok Sabha-ah Union Minister of State for Home G.Kishan Reddy chuan a tar lang a. Heng inkahna thlengah hian venhim hna thawktu mi 72 leh civil mi 70 an thi niin a sawi bawk.
Jammu & Kashmir-a International Border leh LoC-a kum 2018, 2019 leh 2020 chhunga inkahhai bawhchhiatna thlengah hian venhim hna thawktu mi 364-in hliam an tuar a, civil mi 341-in an tuar bawk tih minister chuan a sawi.
India hian a thenawm ramte inremna siampui zelin kar hmasa khan China nena kum khat dawn an inepna, Ladakh khawchhak lam chu ching felin ram pahnihte hian Pangong Lake chhim leh hmar lama sipai an chhawp teuh chu an hnuk kir ta ve ve.
Hetih lai hian ram pahnih inkar hi a la fel vek lo va. Inrinni atanga Pathianni tuk thlenga sipai lalte inbiaknaah Hot Springs, Gogra leh Depsang-a an inepna hmun atanga sipai hnuh kir leh inremna a awm theihna tura inbiak zel ni se an ti.
India leh China ramten Pangong Lake atanga an sipai an hnuk kir hi lehlam lehlam tan hnehna channa ve vea a ngaih thu Army chief Gen MM Naravane chuan a sawi a, buaina ching fel tak tak tur erawh chuan hun a la ngai rei dawn niin a sawi bawk.