- Ruata
India chhulchhuak company hlun leh lar, Mahindra chuan an lirthei zinga lar leh lei tam ber pawl Bolero bika Bolero Neo-ah Limited Edition model an tlangzarh thar a. Hei hi Rs. Nuai 11.49 man atanga intan tur a ni.
Mahindra chuan hun rei tak chhung Mahindra Bolero an tihchhuah hnuah a chi thar deuh, Bolero Neo chu an tichhuak a. Hei pawh hian leitu a ngah chho viau mai a. Tunah hian he model bikah hian Limited Edition an tichhuak thar leh ta a. He lirthei tharah hian danglamna hrang hrang kan hmu dawn a. Tuna Mahindra Bolero Neo chhuak meka N10 variant nghahchhana he Limited Edition hi duan a ni a, a mawi dawn viau bawk a ni.
Mahindra Bolero Neo Limited Edition tlangzarh thar hi a landanah danglamna kan hmu a. A landan mai bakah a lirthei chhunglamah pawh thil thar kan hmu dawn bawk a ni. Hetihlai hian a khawl lamah chuan danglamna kan hmu dawn lemlo a, a khawl ngai tuna Mahindra Bolero Neo in a hman mek ang a la hmang reng dawn tho a. He lirthei leitute tan hmelthar duhthlan tur an rawn dahbelh a ni ber a ni. He lirthei thara thil thar kan hmuh thenkhat te chu – roof ski-rack, fog lamps, headlamps with integrated LED daytime running lamps, Deep Silver a chei spare wheel cover te bakah thildang a awm bawk a ni.
A chhunglamah chuan Mahindra Bolero Neo Limited Edition hian dual-tone faux leather seat, a hmaa thu te tan lumbar support leh height-adjustable driver seat te a ni. A centre console-ah hian vawn ban silver arm-rest, a awm bakah a hnung leh hmaa thu te tan hian arm-rest a awm thar vek bawk a ni. A chhunglamah hian kentel hrang hrang – 7-inch touchscreen infotainment system with reverse parking camera, cruise control, BLueSense connected car tech leh multi-functional steering wheel te Mahindra Bolero Neo Limited Edition chhuak tharah hian kan hmu dawn bawk
A khawl lamah chuan Mahindra Bolero Neo Limited Edition hian sawi tawh angin a khawl ngai, 1.5-litre mHawk 100 diesel engine hmangin he khawl hian 100bhp power leh 260Nm torque te a pechhuak thei a. Transmission lamah chuan 5-speed manual gearbox a hmang a ni.
Mahindra Bolero Neo hi a hmaa Mahindra TUV 300 kan hmuh thin hming thlakna a ni deuh ber a. Hming thlak mai bakah hian thil thar hrang hrang a rawn nei a, an lirthei model hralh kal tak Bolero hming an rawn put tir a. Mahindra Bolero Neo hi Bolero pangngai nena a inanlohna tha tak pakhat chu a variant sang ho hian MLD (mechanical locking rear differential) a nei hi a ni a. Hei hi chhoa a hnung ke phiat thin puitu tur niin a phiah veleh amahin a differential hi a lo in ‘lock’ ta thin a. Hei hian a ke hnung pahnih vir rual tirin nalah leh kawngchhiaah tal chhuah a awlsam phah a ni. Hei hi tuna Limited Edition-ah hian a awm dawn em tih kan hre rih lo na a Bolero Neo top variant hoaah erawh chuan a awm.
Mahindra hian tunhnaiah XUV400 electric SUV an tlangzarh a, hei hi Tata Nexon EV leh MG Astor te el tur a ni a. Hei bakah hian Mahindra hian 5-door LWB version Thar lifestyle SUV chu kumin ral hma ngei hian an tlangzarh hman beisei a ni bawk. Hei mai bakah hian Mahindra atang hian lirthei thar kan hmu leh nual dawn a. Heng lirthei thar tur zingah hian next-gen Bolero leh XUV.e8 electric SUV chu nakum lamah kan hmu leh dawn niin a lang a. Heng lirthei thar ho hi chu Company lam la ngaihchan zel a ngai dawn a ni.