Aizawl: Mizoram Larsap Hari Babu Kambhampati chuan Mizoramin inthlan a hmachhawn tawhah hlawhtlinna langsar tak a awm a, chu hlawhtlinnate chu state dangte entawn mek niin chhuanawm a tih thu a sawi.
Nimin khan Assembly Conference Hall-ah Office of Chief Electoral Officer, Mizoram chuan National Voters’ Day vawi 13-na puala inkhawm a buatsaih a. He hun hi Governor Kambhampati chuan khuallian niin a hmanpui a ni.
Larsap chuan thu sawiin Mizorama political party leh mipuite thuawihna leh inthlanna thianghlim tak kalpui tha tihna avangin boruak muanawm tak hnuaiah inthlanpui thianghlim taka neih thin a nih thu a sawi a. Inthlanna thianghlim neih a nih theih nan a bik takin Mizoram People’s Forum (MPF) leh YMA te an thawh hlawk tak zet tih a sawi.
Tun hnaiah ECI-in mi tinten awlsam taka vote an thlak theih nan leh vote nei thei tura an awlsam taka an inziah luhna turin hmalakna pawimawh tak tak neih a ni tih a sawi a. Taksa lam leh thil dang avanga vote thlak chungchanga harsatna nei thin, a bikin Persona with Disabilities (PwDs)-te tan vote an thlak theihna turin kawng hrang hrangin ruahmanna siam tawh a ni a, a tul anga siam belh mek zel a nih thu a sawi.
Kumin National Voters’ Day-ah hian thupui atan ‘Nothing like voting, I vote for sure’ (Vote thlak hi a pawimawh takzet a; vote thlak ngei ka tum) tih hman a ni.
National Voters’ Day puala hun hmanah hian Dr. Lalhriatzuali Ralte, District Election Officer, Aizawl District in thu a sawi a. He hunah hian Booth Level Officers (BLO) hnathawk tha zualte hnenah Best Performing BLO Award Governor-in a hlan a. Governor hnen atang hian vote nei thar thlan chhuahte chuan EPIC an dawng bawk.