Minister of state a nihna atanga bân a nih hnuah pawh a vui loh thu leh MNF party member a la nih reng thu la sawi fotu, Siaha bialtu MLA, Dr K Beichhua chu MNF party dan kalha cheah puh niin an member a nihna atangin chawlhtir a ni.
MNF President Zoramthanga chuan nimin an party member ni thin mi pahnih chawlhtir an nih chungchangah hriattirna a tichhuak a, Dr K Beichhua chu an part dan kalha che-ah puhin MNF party- dan bu, bung 15, chang 67 tlawh chhanin MNF primary member a nihna atanga chawlhtir a nih thu a puang a ni.
Dr K Beichhua rual hian Mara Autonomous District Council-a MDC ni lai, N. Viakhu pawh MNF primary member a nihna atanga chawlhtir a ni bawk.
MNF party member atanga bân a nih chungchanga The Zozam Times zawhna chhangin Dr K Beichhua chuan an party atanga chawlhtir a nih thu a hriat chu a barakhaih hle tih a sawi a, MNF party dan kalha a chet loh thu a sawi.
Dr K Beichhua chuan minsiter of state a nihna atanga bân a nih hnuah an party emaw, an hruaitute emaw sawi chhe zawnga a tawng ngai loh sawiin, “Tuna bial ka fan meknaah pawh kan party dan kalha ka chet ka hre lo,” a ti.
Siaha MLA chuan minister atanga a bân hnuah erawh a bial chhung khaw hrang hrang a fan kualnaah party bil awm loin mipuiin an lo hmuak a, an lo dawngsawng thin tih sawiin, duhsak taka an lo dawnsawnna chu hnar theih a nih loh thu a sawi.
MNF atanga an bân tak hnuah party dang a zawm dawn leh dawn loh chu tun dinhmunah a la sawi thei rih lo tih leh a bial mipuite rawn chung zela hma lam pan a tum thu a sawi bawk.
MNF party member atanga Dr K Beichhua chawlhtir a nih avanga MLA a nihna nghawng a neih dawn leh dawn loh zawhna chhangin Speaker Lalrinliana Sailo chuan, “Amah a bâng a ni lo va, MLA a nihna hlihsak ngawt theihna dan a awm ka hre lo,” a ti.
Kum 2018 MLA inthlanpui neiha Siaha bial atanga MNF ticket-a vote 8,109 hmua thlan tlin, Dr K Beichhua hi MNF sorkar term kal mekah hian minister of state a ni thin a, Chief Minister Zoramthanga’n ti tura a tih angin December 13, 2022 khan minister of state a nihna atangin bânna a thehlut a, tunah hian MNF member atangin chawlhtir a ni leh ta a ni.