Chris Hipkins chu New Zealand prime minister 41-na atan Nilaini khan lak luh a ni.
Kum 44 mi, Hipkins-a hi kar hmasaa Jacinda Ardern-i’n a bân tur thu a puan hnu lawkah Wellington-a chanvo sang chelh tura rawt zui a ni.
Kum 42 mi, Ardern-i hian ram hruai thei tura ‘a theihna leh chakna a ruak zo tawh’ niin a sawi a. Nilaini khan Governor-General Cindy Kiro-i’n a bânna thehluh a pawmsak zui.
Hipkins-a hi an ramin Covid-19 a hmachhawn dan kalhmang (strategy) avanga tun hnaia lar a ni.
Rorel lai, Labour Party chuan kar tawp liam ta chhung khan Ardern-i thlaktu tur dapin Hipkins-a hian thlawptu a nei tha hle a. Tunah chuan October-a a ram inthlanpui lo awm turah a party chu hnehna chanpui leh tura beihna hna hautak tak a nei dawn a ni.
Mipui ngaihdan laknaah chuan eptu, Nationalist Party chu rorel lai aiin mipuiah an tla na zawk rih mek.
Hripui a len lai khan mi maktaduai nga vel chenna, New Zealand hi ramri khar hmasa ber ram zinga mi a ni a, hei vang hi rei tak chhung chu an him phah a; mahse, mi pahnih khat lek hri kai an awm pawha ram zau tak kharkhip pawp pawp chu an zo lo va, mipui phunna a ring sawt hle.
Hipkins-a hian inkharkhip kalpui vak vak chu a hnuk kir zui ta thuai a ni.Tun hnaiah Hipkins-a hian portfolio pawimawh leh lian tak tak – education, police leh public services a lo chang tawh bawk.
‘Chippy’ tia a hming an phuahsak, fa pahnih nei tawh, Hipkins-a hian a cabinet thutkhawm hmasak ber chu Nilaini khan a ko nghal.
Ardern-i thung chuan prime minister pisa a luah hnuhnung ber ni, Thawhlehni khan Wellington hmar lama khaw tereuh tê, Ratana tlawhin politician leh Maori upate nen hun an hmang a. Tunah chuan MP, farnu/laizawn leh nu ni tura kir turin a inpeih tih a sawi.