Aizawl: Congress MLA Lalrindika Ralte chuan rarion buhfai buk tling lo chu veiawm a tih thu a sawi a. Mizoram puma ration card awm zawng zawng atanga chhuta sorkarin buhfai a lei zat leh a sensote chhutin sum luang ral zat a tam tih a sawi.
Nimina Congres Bhavan-ah ration buhfai chungchang sawi hona neihah MPCC General Secretary Lalrindika Ralte, MLA chuan, “Tunah hian Mizoram pumah ration card 2,82,483 a awm a, ngun taka kan lei zatte leh kan sensote ka chhutin ration card pakhatah kg. 1-in tling lo ta se, Mizoram puma a tlin lohna chu kg. 2,80,000 vel a ni tihna a ni. Tunah hian kg. 1 Rs. 27.50-in sorkarin a lei a, sum luangral zat hi a tam lutuk a ni,” a ti.
Lalrindika Ralte hian ration card pakhatah kg. 4/5 ten buk a tling lo nia a hriat thu a sawi.
Hetianga chhut dawn phei chuan sum bothlau tak tak zat chu a tam hle dawn tih sawiin, he thil hi ven a tihbo theih a nih thu a sawi a. Buhfai buk hi a tling tur a nih thu leh mipuiten an chan tur an chang kim lo hi thil dik lo a nih thu a sawi.
“Buhfai hi sorkarin a tlinga kan lei a nih chuan a tlingin mipuiah kan pe tur a ni. Mi thla (moon)-a an inkah kai tawh laia buhfai a buk tling lo a lo la sem ringawt pawh hi a dik thei lo, kan theih loh hi a te lutuk. Thil dik lo hi kan haw tur a ni,” a ti bawk.
Lalrindika Ralte chuan, Congress party-in sorkarna an chang a nih chuan tun aia tha zawk, hei aia sorkarin sum a sen tlem zawkna tur leh mipui hlimna tur zawk a mipui a buhfai pek dan tur an hriat thu a sawi.