Kum liam ta, 2022 khan khawvel pumah khuarel chhiatna, a bikin sik leh sa uchuak tak tak avanga chhiatna a tam hle a. Kum 10 aia tam mah chhunga sik leh sa avanga mahni in leh lo châna baihvai ta an tam ber kum niin indona leh tharum thawhna avanga chân aiin a let thumin an tam zawk.
Internal Displacement Monitoring Centre-in a chhinchhiah dan chuan nikum chhunga sik leh sa uchuak tak avanga chhiatna thlenga mahni in leh lo chân leh chhuahsana pem ta hi mi maktaduai 30.7 zet an awm niin a sawi a. Heng zinga 75% hi mahni ram (country) chhuahsan lova an awmna ram ngai hmun danga chhuak an ni.
An chhinchhiah dan chuan nikum chhung khan thil hrang hrang avangin mi maktaduai 55 vel an pem a. Heng zingah hian sik leh sa avanga pem (climate migrant) tam berin a zat tak hriat theih a nih loh avangin a tak takah phei chuan an tam hle an ring.
Khawvel puma sik leh sa inthlak nasa chuan chhiatna hrang hrang a thlen niin mi thiamte chuan an ngai.
Mi thenkhat chuan an ram an chhuahsanin ram dang an pan a, hengte erawh mi tam an ni lem lo va, tual chhung veka pem hi an tam ber niin report-ah tar lan a ni a. Pemna vela sum che vel hi nikum khan $ tluklehdingawn 20.5 vel lai niin an sawi bawk.
Mihring chen tamna – China, India, Philippines leh Bangladesh ramte hi cyclone, fur ruahtui leh tui lianin a chhu ziah a. Hetih lai hian nikum khan Atlantic hurricane season-a thlipui leh ruah a thawh tam kum niin United States-ah ringawt pawh mi maktaduai 1.7 vel laiin in leh lo an chân.
Nikum khan khawvel pumh coronavirus avangin buaina a thleng a. Hetianga chhiat tawkte puih leh chhinchhiah kawngah pawh a hma angin thil a fel thei lo va, a tak takah phei chuan chhinchhiah aia tam daih hi a nih a rinawm hle.