Australian Open vawi kua champion tawh Novak Djokovic chuan kuminah a vawi 10-na a champion turin a buk a ti rit sawt leh hle a. Semi-final luh inchuhna inkhelah seeded number five nihna changtu Andrey Rublev chu straight set a hnehin a sawp.
Nilaini a inkhelah kum 35 mi Djokovic hi a chungnung hle a. Tihsual a neih apiangin a aia tha in a khel zui nghal zel emaw tih turin Rublev-a tan chhanlet ngaihna a awm lo va. 6-1 6-2 6-4 in a chak.
World number one hlui, tun tournament a seeded number 4 nihna hauhtu Djokovic hian hliam tenau a neih avangin a mal veilam a tuam leh a. Nimahsela a hliam hian a inkhel a nghawng lo leh.
Tunhnaiah hliam nei chunga a chetthat em avangin mi thenkhatin Djokovic hian hliam nei angin a insawi niin an puh hial.
Fourth round-ah Alex de Minaur a hneh tumin a khelh that em avangin fak a hlawh tawh a. Tun tumah ani aia seeded sang zawk a hneh dan a chian zawk em avangin fak a hlawh leh zual.
Melbourne Park-ah a zawna vawi 26 a chakna a ni a. Open-era a chak zawn rei ber record siamtu Andre Agassi chu a tluk chiah a ni.
“Ka tennis khelh danah hian tunah chuan ka hlim hle. Helai boruak a inkhelh hi nuam ka ti tak zet a, court khawilai atang pawhin ka kheltha em em rih vek.” tiin Djokovic chuan a sawi a. A hliam avangin a inkhelh loh ni ah a practice loh thu a sawi bawk.
“Hetiang hian ka chhunzawm zel rih ang, tunah chuan ka taksa ka uluk a, ka inven thiam a ngai rih. Ka inkhelh leh tur thlirlawk chunga ka inbuatsaih a pawimawh.” tiin a practice loh chungchang chu a sawi.
Djokovic hian naktukah Tommy Paul chu semi-final ah a hmachhawn dawn a. World number 35 ni lai American kum 25 mi hian a hnampui Ben Shelton chu 7-6 (8-6) 6-3 5-7 6-4 in a hneh ve thung.