Australian federal minister chuan an ramchhunga Kanye West luh theih loh dan tur a sawi thawi zui a, Australia leilung rap thei lo mai dinhmunah rapper hi a ding.
Juda huatna sawichhuah ching tak, chi leh chi inkar boruak tiderthawng thei tura khawsa fo hi Minister for Education Jason Clare chuan an rama Kanye West luh theihna chance a awm meuh lova, amah ang bawka khawsa thin midangte an lo mikhual duh lohna enin, rapper tan paw’n khua a var bik a rinawm loh thu a sawi.
“Google ah khan zawng chhin ula, West hi Juda mi maktaduai ruk chuang suat an nihna a hnarkaitu ber Adolf Hitler ngaihsang a, duh em emtu a ni tlat. Heti ang lam hawi ngaisang a, fak thintute hi tunhma pawhin kan ramin a mikhual duh ngai lova, phalna a hnawlsak fo tawh thin,” tiin Clare hian a sawi.
West hian Australia rama luh a duh a, ngenna a thehluh chuan midang ang bawka buaipui tur a ni a, zawhna thahnem tak a chhan a ngai ve tho ang a, a bik taka ‘special treatment’ pek a nih loh tur thu a sawi chiang nghal bawk.