French winger Ousmane Dembele chuan second half ah inkhela goal awmchhun a khung a, 1-0 in Barcelona lakah a team chakpui in Copa del Rey semi–final an lut.
Spotify Camp Nou-ah Nilaini zan khan Copa del Rey quarter-final hi khelh a ni a, Barcelona in Real Sociedad mikhualin a zawnin match 12 tlawm lova kal turin hnehna an chang.
Real Sociedad pawh hi season hmang tha an ni a, an inkhelh hma hian a zawnin inelna hrang hrangah vawi 9 an chak tawh.
Goal hlauhawm pawh nei nualin first half-ah Japanese player hmabak eng tak Takefusa Kubo chuan goal bar a pet per.
Nimahsela halftime hma in an forward Brais Mendez chu hlauhawm taka Sergio Busquets a tlawh avangin hnawhchhuah a ni a, tlem zawk an nih hnuah an tan engkim a harsa zual.
Minute 52-naah tam zawk Barcelona in goal an khung a, Jules Kounde siamsak chu Dembele-a’n goal-ah a thun chiang hle.
Barcelona coach Xavi Hernandez chuan, “Kan inkhelah khan a tha lai tam tak ka hmu. Goal kan khung hnuah minute 10 vel kan inthlahdah a, kha kha thleng lo tur a ni. Goal hmaah kan hriam lo bawk a, kan inthlahdul leh thin. Ball kan hloh hnem lai a awm bawk a, chuvangin minute 60 chhung chu kan tha viau in ka hria.” a ti.