India hmarchhaka mi 11 zet hnenah kumin hian Padma Shri chawimawina hlan an ni a, heng mite hi kawng (field) hrang hranga an thawh hlawkna avanga hlan an ni.
Hmarchhak atanga Padma Shri chawimawina dawngtute hi Assam atangin mi pathum, Tripura atangin mi pahnih, Meghalaya, Arunachal Pradesh, Mizoram leh Sikkim atangin mi pakhat theuh an ni.
Manipur-a mi pahnih hnenah Padma Shri hi hlan an ni bawk.
Tula Ram Upreti chu agriculture lama a thawh hlawkna avangin chawimawina hlan a ni a. Hemoprava Chutia, Hem Chandra Goswami, Risingbor Kurkalang leh KC Runremsangi te chu art lama an thawh hlawkna avanga hlan an ni a. Narendra Chandra Debbarma leh Chaoba Singh te chu vantlang kaihhnawih thilah an inhman nasat avanga hlan an ni a. Jene, Jamatia leh Wangchu te chu vantlang tana hna an thawh nasat avanga hlan niin Shanathoiba Sharma chu infiamna lama a thawh that vanga hlan a ni ve thung.
Debbarma leh Wangchu hnenah Padma Award hlan an ni bawk.
Padma Shri hi a chang chuan Padma Shree tia ziah thin a ni bawk a, India-ah chuan civil mite chawimawina sang palina niin Bharat Ratna, Padma Vibhushan leh Padma Bhushan hnuaia mi a ni.
January 2, 1954 atanga hlan tan niin kawng hrang hrang – art, zirtirna, industry, literature, science, lemchan, damdawi, social service leh public affairs lama thawh hlawk leh inhmang nasa hnenah hlan thin an ni.
India sorkar hian kum tin Republic Day-ah a lawmna pualin a hlan thin a ni.