- Mahmuaka Chhakchhuak
June 1, 2020 zingah chuan Delhi leh Kalkatta atanga kan unau rawn hawte zing atanga mi 12 lai maiin hripui an kai tih kan han hriat chuan min thawng hle a nih kha. Rapthlak kan ti a, Zoram mipui zawng zawng kan nghing nghal lawih a ni ber. Mahni awmhmun theuhah kan chek tlawk tlawk a, engtin tak awm ang i maw tiin kan van ruai a, Sorkar lamin mipui kan him zawkna atan tiin June 1 atangin ni 30 thleng Total Lockdown puangin ruahmanna thar a ti chhuak leh ta a. May 31 chawhnu lamah Sorkar atanga thuchhuak hi puan a ni a, mipui lam erawh ei leh bar dapa kan chhuah nasat bakah kawngpuiah leh kan thil leina hmunahte chuan kan innek nasa hlawm hle mai. Tunah chuan khangte kha a ngaihawm let ling zawk ta.
Hri kai chungchangah hian sawi hmaih theih miah loh chu Netherland atanga rawn haw kan sakhaw puithiam kha a ni. A ni kha March 24-ah a positive tih hmuhchhuah a ni a, rei ang reng tak Damdawiinah enkawl a ni a, a thih leh dam kha nitinin kan ngaihven a ni ber. Pathian zarah dam tha takin May 9-ah damdawiin atangin a rawn chhuak leh thei ta hlauh mai a, Zofa zawng zawngin lawm avangin kut kan beng hial a nih kha. Dama a chhuah hnuah thawm a reh vang vanga, thla khat dawn lai a reh hnuah June thla kan chuangkai a, June nikhat ni atangin khati khan nitin hripui vei thar kan hmuh belh ta char char a nih kha. June 9-ah phei chuan mi 46 lai kan neih belh a nih nghe nghe kha. Mipui zawng zawngin hripui kai thar chungchang hi kan bengkhawn ber a nih bawk avangin chanchin pawh kan hre rang thei viau mai bawk a, chutiang bawkin kan fimkhur sawt viau zel bawk a, khawlai pawh a reh tlawk tlawk viau thin a ni.
Chutiang boruakin chawl loa min han chiah takah chuan kan nuna bet emaw tih mai tur ni hialin mitin kan fimkhur a, inleng neih a nuam lo a, keimahni ngei pawh midang Ina len kan chak lem lo bawkin chhungkuaa Ina tawm kan zir thar a, kan thiam mai lo nain a kum tela hripui nena han chenza ho takah chuan kan lo thiam chho ve zel a, zan lamah pawh hripui len hmaa lirthei tlan bengchheng tak tak thin alo rehin zan dar 8 vel atangin zanlai ang maiin thawm a reh tan a, hmun tina Task Force duty-te chuan min thununin min kaihruai a ni ber mai a, an thu leh hla chu kan bengkhawn ber a ni ta mai. Tumkhat pawh thlai chi thlak tumin ka chhuak a, min lo dangin ka thil tih tur ka han sawi ngial pawh chuan min remtih sak loin min kir tir leh a. Ka rilruin thlai chi thlak tur mai chauh ka ni a, engnge maw hripui leng nena inkungkaihna pawh engmah a nei chuang si lo a, min han phalsak mai awm hi a nia ti chungin Inah ka kir leh ta ringawt a.
Nimahsela vawiinah chuan chutiang boruak rit tak chuan min chimbuai ta loin hripui lak atangin zelenna famkim kan chang tain Dec. 16, 2022 kan lo thlen meuh chuan Mizoram pumah Hripui kai kan awm ta lo hi ava lawmawm tak em. Kum hnih leh thla ruk hnua hetianga hripui kai kan han nei ta miah lo mai hi thil chhinchhiah tlak tak a ni a, theihnghilh chi rual a ni lo. Khati taka hripui vanga kan buaina leh khati taka kan zia min phawrh mualphona zawng zawngte kha tupawh mai hian sawi tur kan ngah hlawmin a rinawm. Mizo inti kristian tha tak te ngei pawh hripui meuh chuan ze thup zawh rual lohin min phawrh sak vek a, Kohhran lama kan chanvo chelh sang tak takte vang pawh chuan kan zia kan thup seng zo lo a, mahni hlawhfa ei leh in man tur tak ngial pawh kan pek theih loh laia veng leh lama a thlawna thil lo va semte pawh sawi tur kan awm hial a nih kha. Hripui zet zawng enlenna tha tak hmanga hmuh theih chauh mah nisela patling, chhungkaw pa tak takte pawh kan ze thup zawng zawng min phawrh mualpho ta vek mai a nih kha.
Chutih laiin Kohhran rawngbawltu tam tak zingah Krista vanga hrehawm pawisa lo mai pawh nilo, nunna thap tak meuh meuha hripui up beh zawh loha hripui hran lai tak pawha Home Quarantine-a awm mekte hnenah rawngbawlna neia an kawngka pawnah tal tawngtaina an neih sak tih thawmte han hriat chuan lawmna avangin mittui a tla thei dawn hial zawk a, tukverh atanga ei tur pe hram hramte, hlau chung chunga mamawh chi hrang hrang inpekte kha theihnghilh phal rual a ni lo. Hri kai zingah ala na deuh an awm a, la na vak lo an awm bawk nain kan ram chhunga hri kai nuaih hnih chuang zinga mi za sarih leh sawm hnih vel lekin nunna an chan kha keimahni theihna vang a ni lo tih chu kan hre chiang theuh awm e.
Khati taka kan nunphung a tih buai dan zawng zawngte kha a a lunglenthlak hlawl loh a, hriat reng lah a nuam hek lo. Nimahsela theihnghilh ngawt lah a theih bawk si loh a, vawiin hunah chuan a ngaihawm letling zawk e tiin sawi ila tu pawi kan sawi lo ang chu maw. Kum 1966 atang rambuai kan tawn chanchin upa lamin an sawi a, tawng ve miah si lo leh beng pawhin a thawm kan hriat ve hauh loh chung pawha kan lo khawngaih em em ang mai hian nakinah chuan kan tu leh fate hnenah kan la sawi chhawng ve mial mai thei a. Chutih hunah chuan tawngkam thiam deuhin an sawi phei chuan tute mittui emaw pawh ala tlak phah ve mial thei a, chutianga sawi tur zingah nang leh kei chuan a takin kan tawng a, a takin kan hmachhawn a nih tak hi.
Chutianga kum 30 hnu vela hripuiin Zoram a chimbuai dan kan han sawi leh hunah chuan engtin tak sawi hlawm ang i maw le? Tute emaw chuan a nuihzatthlak lai hlir emaw te kha an han sawi ang a, tute emaw chuan ni sawm chhung an inkhung chanchinte emaw ei leh in tur neih lo hiala an awmte an han sawi bawk ang a, a thente chuan hripui vanga an hmangaih ngawih ngawih an chan tak chanchin chu lungchhe takin an sawi bawk ngeiin a rinawm a, zan thim tham hnuaia hmanhmawh taka thlanmuala an invui dan chanchinte kha bianga mittui luang zawih zawiha sawi an awm bawk ngei ang. Kan tawn a inang lo theuh angin kan sawi leh dan pawh a danglam ngei ang le. Chutianga sawi theia kan la awm ve a nih chuan keipawhin hripui vanga khung hran kan nih dan chu ka la sawi ve ngei ang a. CoviD Positive ka ni ve tawh dan chu ngaihnawm tham ni kher lo mahsela ka la sawi ve ngei ang.